തിരുവനന്തപുരം സ്വര്ണക്കടത്ത് കേസില് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറിയും മുന് ഐടി സെക്രട്ടറിയുമായിരുന്ന എം ശിവശങ്കറിന്റെ ചോദ്യം ചെയ്യല് പൂര്ത്തിയായി.. പത്ത് മണിക്കൂറോളം നീണ്ട ചോദ്യം ചെയ്യലിന് ശേഷം കസ്റ്റംസ്, ശിവശങ്കറിനെ വീട്ടില് തിരിച്ചെത്തിച്ചു. പുലര്ച്ചെ രണ്ട് മണിയോടെയാണ് ശിവശങ്കറിന്റെ ചോദ്യം ചെയ്യല് അവസാനിച്ചത്.
ചോദ്യംചെയ്യലില് നിര്ണായക വിവരങ്ങള് ലഭിച്ചതായാണ് സൂചന. വിമാനത്താവളത്തില് പിടിയിലായ സ്വര്ണം വിട്ടുനല്കാന് അദ്ദേഹം പലരീതിയില് സമ്മര്ദ്ദം ചെലുത്തിയിയെന്ന് കസ്റ്റംസിനു വിവരം ലഭിച്ചു. കാര്ഗോ കോംപ്ലക്സ് വഴിയും ഇടപെട്ടു. സ്വപ്ന സഹപ്രവര്ത്തകയും സരിത് സുഹൃത്തുമാണെന്ന് ശിവശങ്കര് പറഞ്ഞതായാണ് വിവരം.സ്വപ്നയെ പലതവണ വിളിച്ചിട്ടുണ്ടെന്ന് പറഞ്ഞ അദ്ദേഹം നാലുവര്ഷമായി അവരെ അറിയാമെന്ന് സമ്മതിച്ചു. അതേസമയം, ജൂലായ് ഒന്ന്, രണ്ട് തീയതകളില് തിരുവനന്തപുരത്തെ ഹില്ട്ടണ് ഇന് ഹോട്ടലില് തങ്ങിയ നാലുപേരെക്കുറിച്ചുള്ള സംശയത്തിന്റെ അടിസ്ഥാനത്തില് താമസക്കാരുടെ രജിസ്റ്ററും സി.സി.ടി.വി. ദൃശ്യങ്ങളും കസ്റ്റംസ് സംഘം ശേഖരിച്ചു. ഇവരെ ശിവശങ്കര് കണ്ടതിന്റെ ദൃശ്യങ്ങള് കിട്ടി.
കസ്റ്റംസിന്റെ നോട്ടീസ് ലഭിച്ചതിനെ തുടര്ന്ന് അദ്ദേഹം തിരുവനന്തപുരത്തെ ഓഫീസില് ചോദ്യംചെയ്യലിന് ഹാജരാവുകയായിരുന്നു. ഇന്നലെ ആദ്യം സ്വര്ണക്കടത്ത് കേസിലെ അന്വേഷണ ഉദ്യോഗസ്ഥര് ശിവശങ്കറിന്റെ വീട്ടിലെത്തിയിരുന്നു. മൂന്ന് ഉദ്യോഗസ്ഥരാണ് ശിവശങ്കറിന്റെ വീട്ടിലെത്തിയത്. ശിവശങ്കറിന്റെ പൂജപ്പുരയിലെ വീട്ടില് പത്ത് മിനിറ്റോളം ചെലവഴിച്ചതിനു ശേഷമാണ് ഉദ്യോഗസ്ഥര് മടങ്ങിയത്. ഔദ്യോഗിക ബോര്ഡ് ഇല്ലാത്ത വാഹനത്തിലാണ് ഉദ്യോഗസ്ഥര് എത്തിയത്. മാധ്യമങ്ങളോട് പ്രതികരിക്കാനും ഉദ്യോഗസ്ഥര് തയാറായില്ല. കസ്റ്റംസ് ഡി.ആര്.ഐ സംഘം ശിവശങ്കറിന്റെ തിരുവനന്തപുരത്തെ വീട്ടിലെത്തി. ചോദ്യംചെയ്യലിനായി കൊച്ചി ഓഫീസില് ഹാജരാകാന് ആവശ്യപ്പെട്ടുകൊണ്ടുള്ള നോട്ടീസ് നല്കാനാണ് ഉദ്യോഗസ്ഥര് എത്തിയത്.
സ്വര്ണക്കള്ളക്കടത്ത് പ്രതി സ്വപ്ന സുരേഷുമായി ശിവശങ്കറിന് ബന്ധമുണ്ടെന്ന ആരോപണം ഉയര്ന്നിരുന്നു. ഈ സാഹചര്യത്തില് അന്വേഷണത്തിന്റെ ഭാഗമായാണ് ശിവശങ്കറിനെ ചോദ്യം ചെയ്തത്. ശിവശങ്കറുമായി കേസിലെ പ്രതികള്ക്കുണ്ടായിരുന്നത് സൗഹൃദം മാത്രമായിരുന്നോ അതോ സ്വര്ണക്കടത്തുമായി ഏതെങ്കിലും തരത്തിലുള്ള ബന്ധമുണ്ടോ എന്നാണ് അന്വേഷിക്കുന്നത്. ശിവശങ്കരന്റെ ഫ്ലാറ്റില് വെച്ച് ഗൂഢാലോചന നടന്നെന്ന സരിത്തിന്റെ മൊഴിയുടെ അടിസ്ഥാനത്തിലാണ് ശിവശങ്കറിനെ ചോദ്യം ചെയ്യാനായി വിളിപ്പിച്ചത്.
നയതന്ത്ര ബാഗിലൂടെ സ്വര്ണം കടത്താന് ഗൂഢാലോചന നടത്തിയത് ശിവശങ്കറിന്റെ ഉടമസ്ഥതയിലുള്ള ഫ്ലാറ്റില് വെച്ചാണെന്ന സൂചനകള് നേരത്തെ തന്നെ കസ്റ്റംസിന് ലഭിച്ചിരുന്നു. ഇതിന്റെ അടിസ്ഥാനത്തില് ഇവിടെ റെയ്ഡും നടത്തി. സിസിടിവി അടക്കുള്ള തെളിവുകള് വെച്ച് സരിത്തിനെ കൂടുതല് ചെയ്തതോടെയാണ് ഇക്കാര്യം സരിത്ത് സമ്മതിച്ചത്. സ്വപ്നയും സന്ദീപുമായി പല തവണ ഇവിടെ വെച്ച് കൂടിക്കാഴ്ച നടത്തിയതായി സരിത്ത് സമ്മതിച്ചതായാണ് വിവരം.