ബന്ധുനിയമനത്തില് മന്ത്രി കെ.ടി ജലീല് കുറ്റക്കാരനെന്ന് ലോകായുക്ത കണ്ടെത്തിയിരുന്നു. അതേസമയം മന്ത്രി കെ.ടി ജലീല് തന്റെ ബന്ധുവായ കെ.ടി അദീബിന്റെ യോഗ്യതയ്ക്ക് അനുസരിച്ച് യോഗ്യതാ മാനദണ്ഡം മാറ്റാന് ആവശ്യപ്പെട്ട് നല്കിയ കത്ത് ഇപ്പോള് പുറത്ത് വന്നിരിക്കുകയാണ്. മന്ത്രിയുടെ കീഴിലുള്ള ന്യൂനപക്ഷ വികസന ധനകാര്യ കോര്പ്പറേഷനിലെ നിയമനത്തിനുള്ള യോഗ്യതയില് മാറ്റം വരുത്താനാണ് കത്ത് നല്കിയത്. ബന്ധുവായ കെ.ടി അദീബിന്റെ യോഗ്യതയ്ക്ക് അനുസരിച്ച് ഈ തസ്തിക മാറ്റണമെന്ന് മന്ത്രി ആവശ്യപ്പെടുകയായിരുന്നു
കെ.ടി ജലീല് മന്ത്രിയായി ചുമതലയേറ്റ് ഏതാണ്ട് രണ്ട് മാസമായപ്പോഴാണ് ഈ കത്ത് നല്കിയത്. ന്യൂനപക്ഷ വികസന ധനകാര്യ കോര്പറേഷനിലേക്ക് ജീവനക്കാരെ നിയമിക്കുന്നതിനായി കഴിഞ്ഞ സര്ക്കാരിന്റെ കാലത്ത് 2962013 ല് കൃത്യമായ യോഗ്യത നിശ്ചയിച്ചിരുന്നു. ഈ ഉത്തരവില് മറ്റം വരുത്തണമെന്ന് ആവശ്യപ്പെട്ടുകൊണ്ടാണ് കത്ത് നല്കിയത്.
ജനറല് മാനേജറുടെ യോഗ്യത ബിടെക്കും ഇതോടൊപ്പം പിജിഡിബിഎ എന്ന് കൂടി മാറ്റി യോഗ്യത നിശ്ചയിക്കണമെന്നാണ് ജലീല് ആവശ്യപ്പെട്ടത്. മന്ത്രിയുടെ ബന്ധുവായ കെ.ടി അദീബിന്റെ യോഗ്യതയാണ് ബിടെക്കും പിജിഡിബിഎയും. ഈ കത്തിന്റെ അടിസ്ഥാനത്തില് യോഗ്യത മാറ്റി നിശ്ചയിച്ചു സെക്രട്ടറി ഉത്തരവിറക്കുകയും ചെയ്തു.
നിയമവിരുദ്ധമായി ബന്ധുനിയമനം നടത്തി എന്ന ജലീലിനെതിരായ ആരോപണം പൂര്ണമായും സത്യമാണെന്നും ജലീല് മന്ത്രി സ്ഥാനത്ത് തുടരാന് പാടില്ലെന്നും തുടര്നടപടി മുഖ്യമന്ത്രി പിണറായി വിജയന് എടുക്കണമെന്നും ലോകായുക്ത റിപ്പോര്ട്ടില് പറയുന്നു.
വി.കെ. മുഹമ്മദ് ഷാഫി എന്ന വ്യക്തിയാണ് ജലീലിനെതിരെ പരാതി നല്കിയിരുന്നത്. പരാതിയില് ഉന്നയിച്ച എല്ലാ കാര്യങ്ങളും സത്യമാണെന്നും മന്ത്രി സത്യപ്രതിജ്ഞാ ലംഘനവും സ്വജനപക്ഷപാതിത്വവും കാണിച്ചെന്നും ലോകായുക്ത പറയുന്നു.