ഇക്കഴിഞ്ഞ സമരങ്ങളില്‍ സ്വന്തം അംഗങ്ങളുടെ പിന്തുണ കുറഞ്ഞിട്ടും പിടിവാശിയില്‍ നിന്നും പിന്‍വാങ്ങാതെ ഇംഗ്ലണ്ടിലെ റസിഡന്റ് ഡോക്ടര്‍മാരുടെ സംഘടന. അടുത്ത ആറ് മാസത്തേക്ക് കൂടി തൊഴിലും, ശമ്പളവും ഉറപ്പാക്കാന്‍ ആവശ്യപ്പെട്ട് സമരം നടത്താനുള്ള അനുമതി തേടി ബാലറ്റിംഗ് നടത്തുമെന്നാണ് ബ്രിട്ടീഷ് മെഡിക്കല്‍ അസോസിയേഷന്‍ പ്രഖ്യാപിച്ചിരിക്കുന്നത്.
ബാലറ്റിംഗ് വിജയകരമായാല്‍ നിലവിലെ അനുമതി 2026 ജനുവരി മുതല്‍ ആഗസ്റ്റ് വരെ നീളും. 'ഈ പ്രശ്‌നം മാസങ്ങള്‍ക്ക് മുന്‍പ് തീര്‍ക്കാമായിരുന്നു. ഉത്തരവാദിത്വമുള്ള തൊഴില്‍ ശമ്പള കരാര്‍ ഉണ്ടായിരുന്നെങ്കില്‍ ഇത് സാധിക്കും. ഏതാനും വര്‍ഷങ്ങള്‍ കൊണ്ട് ഘട്ടംഘട്ടമായി വരുമാനം ഉയര്‍ത്താനും, മിനിമം ബോധമുള്ള തൊഴില്‍ സുരക്ഷയുമാണ് ഡോക്ടര്‍മാര്‍ ആവശ്യപ്പെടുന്നത്. ആറ് മാസം കൂടി തടസ്സങ്ങള്‍ നീളാന്‍ ആരും ആഗ്രഹിക്കുന്നില്ല. പരിഷ്‌കാരങ്ങള്‍ വരുത്താന്‍ ഗവണ്‍മെന്റിന് ഇതാണ് വേണ്ടതെങ്കില്‍ നടക്കട്ടെ', ബിഎംഎ റസിഡന്റ് ഡോക്ടര്‍ കമ്മിറ്റി ചെയര്‍മാന്‍ ഡോ. ജാക്ക് ഫ്‌ളെച്ചര്‍ പറഞ്ഞു.
നവംബര്‍ 14 മുതല്‍ 19 വരെയാണ് റസിഡന്റ് ഡോക്ടര്‍മാരുടെ അവസാന പണിമുടക്ക് നടന്നത്. ഡിസംബര്‍ 8 മുതല്‍ ഫെബ്രുവരി 2 വരെയാണ് പുതിയ ബാലറ്റിംഗ്. എന്നാല്‍ രോഗികളെയും, എന്‍എച്ച്എസിനെയും, റസിഡന്റ് ഡോക്ടര്‍മാരെ തന്നെയും അപകടത്തിലാക്കുന്ന അനാവശ്യ സമരനടപടികള്‍ ഉന്നയിച്ച് ഭീഷണിപ്പെടുത്തുന്നത് നിരാശാജനകമാണെന്ന് ഹെല്‍ത്ത് സെക്രട്ടറി വെസ് സ്ട്രീറ്റിംഗ് പ്രതികരിച്ചു.
സമരം നടത്തി പ്രതിസന്ധി സൃഷ്ടിക്കുന്നതിന് പകരം ചര്‍ച്ചകള്‍ക്ക് തയ്യാറാകാനും ഹെല്‍ത്ത് സെക്രട്ടറി ആവശ്യപ്പെട്ടു. ഡോക്ടര്‍മാരുടെ യൂണിയനുമായി നേരിട്ടുള്ള പോരാട്ടത്തിലേക്ക് കാര്യങ്ങള്‍ എത്തിനില്‍ക്കുമ്പോള്‍ എന്‍എച്ച്എസ് പ്രതിസന്ധി വര്‍ദ്ധിക്കാന്‍ തന്നെയാണ് സാധ്യത തെളിയുന്നത്.
