സൈനികര്‍ക്ക് ധൈര്യം തെളിയിക്കാന്‍ പലവിധ വഴികളുണ്ട്. എതിരാളികളെ വെടിവെച്ച് കൊല്ലാം, യുദ്ധമേഖലയില്‍ നുഴഞ്ഞുകയറാം എന്നിങ്ങനെ പല പരിപാടികളും യുദ്ധവീരന്‍മാരെ നിര്‍ണ്ണയിക്കുന്നു. എന്നാല്‍ ബ്രിട്ടീഷ് സൈന്യത്തില്‍ യുവ സൈനികരെ പ്രവേശിപ്പിക്കുമ്പോള്‍ ധൈര്യം തെളിയിക്കാന്‍ ചില അലിഖിതമായ ആചാരങ്ങളാണ് നടപ്പാക്കുന്നതെന്നാണ് ഞെട്ടിക്കുന്ന റിപ്പോര്‍ട്ട്.
കെനിയയില്‍ പരിശീലനത്തിലുള്ള ബ്രിട്ടീഷ് സൈനികര്‍ക്കിടയില്‍ നടത്തുന്ന പ്രവേശന ചടങ്ങിലാണ് യുവ റിക്രൂട്ടുകളെ ലൈംഗിക തൊഴിലാളികളുമായി സുരക്ഷിതമല്ലാത്ത ലൈംഗിക ബന്ധത്തില്‍ ഏര്‍പ്പെടാന്‍ നിര്‍ബന്ധിക്കുന്നതെന്ന് മെയില്‍ റിപ്പോര്‍ട്ട് വെളിപ്പെടുത്തുന്നു. സീനിയര്‍ സൈനികര്‍ ടോസ് ഇട്ടാണ് യുവ സൈനികര്‍ കോണ്ടം ഇടണോ, വേണ്ടയോ എന്ന് തീരുമാനിക്കുന്നത്. ഇതുവഴി ഇവരുടെ ധൈര്യം തെളിയിക്കാമെന്നാണ് പറയപ്പെടുന്നത്. 
കെനിയയില്‍ എയ്ഡ്‌സ്/എച്ച്‌ഐവി നിരക്ക് വളരെ ഉയര്‍ന്ന തോതിലായതിനാല്‍ ഈ വെളിപ്പെടുത്തല്‍ പ്രതിരോധ മേധാവികളെ ഞെട്ടിക്കുകയാണ്. അവിടെ 20 പേരില്‍ ഒരാള്‍ക്ക് വീതം രോഗമുണ്ടെന്നാണ് കണക്ക്. ഓരോ വര്‍ഷവും കെനിയയില്‍ ഏകദേശം 10,000 ബ്രിട്ടീഷ് സൈനികരെയാണ് എട്ടാഴ്ച വീതമുള്ള ലൈവ് ഫയറിംഗ് പരിശീലനത്തിനായി അയയ്ക്കുന്നത്.
ഇവിടുത്തെ ബേസിന് പുറത്ത് ലൈംഗിക തൊഴിലാളികള്‍ കറങ്ങി നടക്കും. കെനിയയില്‍ നിന്നും മടങ്ങിയെത്തിയ സൈനികരില്‍ നിന്നും ഇതുസംബന്ധിച്ച പഠനം നടത്തിയ ബ്രിട്ടീഷ് മെഡിക്കല്‍ ജേണല്‍ മിലിറ്ററി ഹെല്‍ത്താണ് വിവരങ്ങള്‍ കണ്ടെത്തിയത്. കെനിയയില്‍ പരിശീലനത്തിന് അയയ്ക്കുന്ന പുതിയ സൈനികര്‍ക്ക് ഇത്തരം പ്രവേശന ചടങ്ങുള്ളതായി പേര് വെളിപ്പെടുത്താത്ത ഒരു സൈനികന്‍ പ്രതിരോധ മന്ത്രാലയത്തോട് പറഞ്ഞു. ഈസ്റ്റ് ആഫ്രിക്കന്‍ രാജ്യത്തേക്ക് വിടുന്ന സൈനികര്‍ അധികമായി ലൈംഗിക രോഗങ്ങള്‍ ചികിത്സ തേടുന്നുണ്ട്.
