കര്ണാടകയിലെ ഹാസനിലെ എന്ഡിഎ സ്ഥാനാര്ത്ഥിയും ജെഡിഎസ് സിറ്റിംഗ് എംപിയുമായ പ്രജ്വല് രേവണ്ണയ്ക്കെതിരെയുള്ള ലൈംഗികാതിക്രമ കേസിലുള്ളത് ഗുരുതരമായ ആരോപണങ്ങള്. 'പ്രജ്വല് തോക്ക് ചൂണ്ടി ബലാത്സംഗം ചെയ്തു, ദൃശ്യം പകര്ത്തി'യെന്നാണ് പരാതിയില് പറയുന്നത്. ജെഡിഎസ് പ്രാദേശിക നേതാവായ യുവതിയാണ് പരാതി നല്കിയത്.
പ്രജ്വല് തോക്ക് ചൂണ്ടി പീഡിപ്പിച്ചു. 3 വര്ഷത്തോളം പല തവണ പീഡിപ്പിച്ചെന്ന് യുവതി പരാതിയില് പറയുന്നുണ്ട്. ഭീഷണിപ്പെടുത്തി പീഡിപ്പിച്ച ദൃശ്യങ്ങള് ഫോണില് പകര്ത്തുകയായിരുന്നു. അത് പുറത്ത് വിടുമെന്ന് പറഞ്ഞ് 3 വര്ഷത്തോളം പീഡനം തുടര്ന്നു. 2021 മുതല് പീഡനം തുടരുകയായിരുന്നെന്നും പരാതി നല്കാന് പേടിയായിരുന്നുവെന്നും യുവതി പറയുന്നു. ഹാസനിലെ തദ്ദേശ സ്വയംഭരണ സ്ഥാപനങ്ങളില് ഒന്നില് ആണ് യുവതി ജോലി ചെയ്യുന്നത്.
അതേസമയം, പ്രജ്വല് രേവണ്ണയ്ക്കെതിരെ ലുക്ക്ഔട്ട് നോട്ടീസ് ഇറക്കിയിരിക്കുകയാണ്. ലൈംഗികാതിക്രമക്കേസ് അന്വേഷിക്കുന്ന പ്രത്യേക അന്വേഷണ സംഘമാണ് ലുക്ക് ഔട്ട് നോട്ടീസ് പുറത്തിറക്കിയത്. രാജ്യത്തെ വിമാനത്താവളങ്ങള്, തുറമുഖങ്ങള്, ഇമിഗ്രേഷന് പോയന്റുകള് എന്നിവിടങ്ങളിലാണ് ലുക്ക് ഔട്ട് നോട്ടീസ് പുറത്തിറക്കിയത്. വിദേശത്തേക്ക് പോയ പ്രജ്വല് ഈ സ്ഥലങ്ങളിലിറങ്ങിയാല് കസ്റ്റഡിയിലെടുക്കാനാണ് ലുക്ക് ഔട്ട് നോട്ടീസ് പ്രസിദ്ധീകരിച്ചത്. പ്രജ്വല് രേവണ്ണ നാലാം ഘട്ട തെരഞ്ഞെടുപ്പ് കൂടി കഴിഞ്ഞേ വിദേശത്ത് നിന്നും തിരികെയെത്തുകയുളളുവെന്നാണ് വിവരം. തിരിച്ചെത്താന് ടിക്കറ്റ് ബുക്ക് ചെയ്തെന്നും സൂചനയുണ്ട്.
ലൈംഗികാതിക്രമ പരാതിയില് പ്രജ്വല് രേവണ്ണയ്ക്കും പിതാവ് എംഎല്എ രേവണ്ണയ്ക്കും പ്രത്യേകാന്വേഷണ സംഘം സമന്സയച്ചിട്ടുണ്ട്. ഹൊലെനരസിപുര സ്റ്റേഷനില് രജിസ്റ്റര് ചെയ്യപ്പെട്ട ലൈംഗികപീഡനപ്പരാതിയുടെ അടിസ്ഥാനത്തിലാണ് പ്രജ്വല് രേവണ്ണയ്ക്കും അച്ഛന് രേവണ്ണയ്ക്കും പ്രത്യേകാന്വേഷസംഘം സമന്സയച്ചിരിക്കുന്നത്. എത്രയും പെട്ടെന്ന് നേരിട്ട് ഹാജരാകാനാണ് നോട്ടീസില് ആവശ്യപ്പെട്ടിരിക്കുന്നത്. സംസ്ഥാനത്ത് പ്രചരിച്ച ആയിരക്കണക്കിന് അശ്ലീല വീഡിയോകളില് വിശദീകരണം നല്കണമെന്നും സമന്സില് ആവശ്യപ്പെട്ടിട്ടുണ്ട്.
ഗുരുതരമായ കുറ്റകൃത്യങ്ങള് നടത്തിയ ഒരാളെ തിരിച്ച് ഇന്ത്യയിലേക്ക് നാടുകടത്താന് ജര്മന് ഫെഡറല് പൊലീസിനെ വിദേശകാര്യമന്ത്രാലയത്തിന്റെ സഹായത്തോടെ വിവരമറിയിക്കണം. നാടുകടത്തേണ്ട തരം കുറ്റമാണ് പ്രതി ചെയ്തതെന്ന് ഫെഡറല് പൊലീസിന് ബോധ്യപ്പെട്ടാല് ലോക്കല് ഫോറിനര് റജിസ്ട്രേഷന് ഓഫീസിനെ വിവരമറിയിച്ച് പ്രതിയെ ലോക്കല് പൊലീസ് കസ്റ്റഡിയിലെടുക്കും. ഫെഡറല് പൊലീസിന് കൈമാറും. അവിടെ നിന്ന് ഫെഡറല് പൊലീസ് ഉദ്യോഗസ്ഥര് തന്നെ വിമാനമാര്ഗം പ്രതിയെ ഇന്ത്യയിലെത്തിച്ച് തദ്ദേശീയ പൊലീസിന് കൈമാറും.
പ്രജ്വല് രേവണ്ണയുമായി ബന്ധപ്പെട്ട അശ്ലീല വീഡിയോ വിവാദത്തിന് പിന്നാലെ പ്രജ്വലിന്റെ വീട്ടില് ജോലി ചെയ്തിരുന്ന സ്ത്രീയും പരാതിനല്കിയിരുന്നു. പ്രജ്വലിനും പിതാവ് എച്ച്ഡി രേവണ്ണയ്ക്കുമെതിരെയാണ് ലൈംഗികമായി പീഡിപ്പിച്ചെന്ന പരാതി ജോലിക്കാരി നല്കിയത്. ജെഡിഎസ് ദേശീയ അധ്യക്ഷനും മുന് പ്രധാനമന്ത്രിയുമായ എച്ച്ഡി ദേവഗൗഡയുടെ മകനാണ് മുന്മന്ത്രി എച്ച്ഡി രേവണ്ണ. രേവണ്ണയുടെ മകനാണ് പ്രജ്വല്.
ജോലിക്ക് ചേര്ന്ന് നാലാം മാസം മുതല് പ്രജ്വല് തന്നെ ക്വാര്ട്ടേഴ്സിലേക്ക് വിളിപ്പിക്കാന് തുടങ്ങിയെന്നും എച്ച്ഡി രേവണ്ണയും പ്രജ്വലും വനിതാ ജോലിക്കാരെ വീട്ടില് വെച്ച് ലൈംഗികമായി പീഡിപ്പിച്ചെന്നും അതിജീവിത ആരോപിച്ചു. രേവണ്ണയുടെ ഭാര്യ വീട്ടിലില്ലാത്തപ്പോഴെല്ലാം അയാള് സ്ത്രീകളെ സ്റ്റോര് റൂമിലേക്ക് വിളിപ്പിക്കും. പഴങ്ങള് കൊടുക്കുന്ന സമയത്ത് ശരീരത്തില് സ്പര്ശിക്കും. സാരിയുടെ പിന്നുകള് അഴിച്ച് ലൈംഗികമായി ഉപദ്രവിക്കാന് തുടങ്ങും അവര് കൂട്ടിച്ചേര്ത്തു.