പൗരത്വ ഭേദഗതി നിയമം പിന്വലിക്കാന് പ്രതിപക്ഷത്തെ വെല്ലുവിളിച്ച് കേന്ദ്ര ആഭ്യന്തര മന്ത്രി അമിത് ഷാ. ഉയിര്ത്തെഴുന്നേറ്റ് വന്നാലും ഇന്ദിരാ ഗാന്ധിക്ക് പോലും സിഎഎ പിന്വലിക്കാനാവില്ലെന്നും അമിത് ഷാ പറഞ്ഞു. ഉത്തര്പ്രദേശിലെ ലക്കിംപൂരില് പൊതുപരിപാടിയില് സംസാരിക്കുകയായിരുന്നു അമിത് ഷാ.
'രാഹുല് ഗാന്ധിയുടെ നാനിക്ക് (ഇന്ദിരാ ഗാന്ധി) പോലും, അവര് ഉയിര്ത്തെഴുന്നേറ്റ് വന്നാല്, സിഎഎ റദ്ദാക്കാനാവില്ല. പാകിസ്താനില് നിന്നും ബംഗ്ലാദേശില് നിന്നും എത്തിയ ന്യൂനപക്ഷങ്ങള്ക്ക് പ്രധാനമന്ത്രി നരേന്ദ്രമോദിയുടെ നേതൃത്വത്തില് പൗരത്വം നല്കുക തന്നെ ചെയ്യും. 'തിരഞ്ഞെടുപ്പ് പ്രചാരണ റാലിയില് അമിത് ഷാ പറഞ്ഞു.
രാഹുല് ഗാന്ധി റായ്ബറേലിയില് പരാജയപ്പെടുമെന്നും അതിനു ശേഷം ഇറ്റലിയില് സ്ഥിരതാമസമാക്കണമെന്നും അമിത് ഷാ പരിഹസിച്ചു. പാകിസ്താന്റെ അജണ്ടകളാണ് രാഹുല് മുന്നോട്ടുവെക്കുന്നതെന്നും വോട്ടുബാങ്കിനെ ഭയന്നാണ് പ്രതിപക്ഷനേതാക്കള് രാമക്ഷേത്ര പ്രതിഷ്ഠാചടങ്ങില് പങ്കെടുക്കാതിരുന്നത്. തിരഞ്ഞെടുപ്പില് ഇന്ഡ്യ സഖ്യം വിജയിച്ചാല് പാകിസ്താനില് പടക്കം പൊട്ടും. ബിജെപിക്ക് വോട്ടുബാങ്കില് ഭയമില്ല. പ്രതിപക്ഷപാര്ട്ടികള് അധികാരത്തിലെത്തിയാല് അവര് രാമക്ഷേത്രത്തിന് ബാബറി പൂട്ട് ഇടുമെന്നും അമിത് ഷാ പറഞ്ഞു.
ഈ വര്ഷം മാര്ച്ചിലാണ് ബിജെപി സര്ക്കാര് രാജ്യത്ത് പൗരത്വ ഭേദഗതി നിയമം കൊണ്ടുവന്നത്. പാകിസ്താന്, ബംഗ്ലാദേശ്, അഫ്ഗാനിസ്ഥാന് എന്നിവിടങ്ങളില് നിന്ന് ഇന്ത്യയിലെത്തി സ്ഥിരതാമസമാക്കിയ മുസ്ലിം ഇതര മതവിഭാഗത്തില് പെട്ടവര്ക്ക് പൗരത്വം നല്കുന്നതാണ് നിയമം. ഇത് വിവേചനപരവും ഭരണഘടനാ വിരുദ്ധവുമാണെന്ന് പ്രതിപക്ഷം ആരോപിക്കുന്നു.