മാര്‍ച്ച് മാസത്തില്‍ വീട് വാങ്ങാനുള്ള ഡിമാന്‍ഡ് വര്‍ദ്ധിച്ചതും, ശക്തമായ വീട് വില്‍പ്പനയും ചേര്‍ന്ന് യുകെയിലെ വീടുകള്‍ ചോദിക്കുന്ന ശരാശരി വിലയില്‍ 5279 പൗണ്ടിന്റെ വര്‍ദ്ധന. ഇതോടെ ശരാശരി വീടുകളുടെ വില 370,000 പൗണ്ടിലേക്കാണ് കുതിച്ചുയര്‍ന്നത്. 2023-ല്‍ താരതമ്യേന നിശബ്ദമായിരുന്ന ഭവനവിപണിയാണ് ഇപ്പോള്‍ തിരിച്ചുവരവ് നടത്തുന്നത്.
യുകെയിലെ ഏറ്റവും വലിയ പ്രോപ്പര്‍ട്ടി വെബ്‌സൈറ്റ് റൈറ്റ്മൂവ് നല്‍കുന്ന കണക്കുകള്‍ പ്രകാരം ഈ മാസം 1.5% വില വര്‍ദ്ധനവാണ് രേഖപ്പെടുത്തിയത്. സാധാരണ മാര്‍ച്ച് മാസങ്ങളിലെ 1% വര്‍ദ്ധനയെ മറികടന്നാണ് ഈ കുതിപ്പ്. 10 മാസത്തിനിടെയുള്ള ഏറ്റവും വലിയ പ്രതിമാസ വര്‍ദ്ധനവ് കൂടിയാണിത്. 
ഈ മാസം വാങ്ങാന്‍ തയ്യാറാകുന്നവരുടെ എണ്ണത്തിലും സുപ്രധാന വര്‍ദ്ധനവ് ഉണ്ടായിട്ടുണ്ടൈന്ന് റൈറ്റ്മൂവ് വ്യക്തമാക്കുന്നു. വീട് വാങ്ങാന്‍ അവസരം ലഭിക്കുന്നതായി കരുതുന്നവരുടെ എണ്ണമേറിയതാണ് ഇതിന് കാരണം. യുകെയിലെ ശരാശരി ചോദിക്കുന്ന വില ഇപ്പോള്‍ 368,118 പൗണ്ടിലെത്തിയെന്നാണ് വെബ്‌സൈറ്റ് പറയുന്നത്. 2023-ലെ അസ്ഥിരതയ്ക്ക് ശേഷമാണ് വിപണി ചൂടുപിടിക്കുന്നത്.
മാര്‍ച്ച് മാസം ആരംഭിച്ചതിന് ശേഷം തീരുമാനത്തിലെത്തിയ വില്‍പ്പനകള്‍ കഴിഞ്ഞ വര്‍ഷത്തെ അപേക്ഷിച്ച് 13% കൂടുതലാണ്. അതേസമയം വലിയ വീടുകള്‍ക്കാണ് പ്രധാനമായും ആവശ്യമേറുന്നത്. ലണ്ടനിലാണ് ഏറ്റവും കൂടുതല്‍ ഡിമാന്‍ഡുള്ളത്. ഏതാനും ആഴ്ചകള്‍ ഒതുങ്ങിയ മോര്‍ട്ട്‌ഗേജ് നിരക്ക് വര്‍ദ്ധനവുകള്‍ക്ക് ശേഷം ഇപ്പോള്‍ അഞ്ച് വര്‍ഷത്തെ ഫിക്‌സഡ് മോര്‍ട്ട്‌ഗേജ് റേറ്റ് 4.84 ശതമാനത്തിലാണ്.
