നിര്‍ബന്ധിത മതപരിവര്‍ത്തനത്തിന് കടുത്ത ശിക്ഷയുമായി രാജസ്ഥാന്‍. കൂട്ടായ മതം മാറ്റത്തിന് 20 വര്‍ഷം തടവും 25 ലക്ഷം പിഴയും ഉറപ്പാക്കുന്ന നിയമ ഭേദഗതി ബില്‍ ഇന്ന് നിയമസഭയില്‍ വെക്കും. ദളിത്, ഗോത്ര വിഭാഗങ്ങളില്‍പ്പെട്ടവരെ മതം മാറ്റിയാല്‍ 20 വര്‍ഷം വരെ തടവും 10 ലക്ഷം പിഴയുമാണ് പുതിയ നിയമത്തില്‍ പറയുന്നത്.
കടുത്ത വ്യവസ്ഥകളോട് കൂടിയാണ് നിയമം നിയമസഭയിലേക്ക് രാജസ്ഥാന്‍ സര്‍ക്കാര്‍ കൊണ്ടുവന്നിരിക്കുന്നത്. രാജസ്ഥാനിലെ നിര്‍ബന്ധിത മതപരിവര്‍ത്തന നിരോധന നിയമം 2025 എന്ന പേരില്‍ ഫെബ്രുവരിയില്‍ ഈ നിയമം സഭയില്‍ കൊണ്ടുവന്നിരുന്നെങ്കിലും അതൊരു ചര്‍ച്ചയിലേക്ക് നീണ്ടിരുന്നില്ല. പിന്നീട്, ഇത് പിന്‍വിലിച്ചുകൊണ്ടാണ് കടുത്ത വ്യവസ്ഥകളോട് കൂടിയുള്ള നിയമം ഇപ്പോള്‍ കൊണ്ടുവന്നിരിക്കുന്നത്. പുതിയ നിയമപ്രകാരം ഏതെങ്കിലും ഒരാള്‍ അയാളുടെ പൂര്‍വ്വികരുടെ മതത്തിലേക്ക് (ഘര്‍ വാപസി) തിരികെ പോകുന്നതിന് ശിക്ഷയില്ല. ഇതിനെ നിര്‍ബന്ധിത മതപരിവര്‍ത്തനമായി കാണാന്‍ കഴിയില്ല എന്നാണ് നിയമത്തില്‍ പറയുന്നത്. പുതിയ നിയമ ഭേദഗതി ബില്‍ ഇന്ന് രാജസ്ഥാന്‍ നിയമസഭയുടെ മേശപ്പുറത്ത് വെക്കും.
