അമേരിക്കയുടെ പിടിയിലായ വെനസ്വേല പ്രസിഡന്റ് നിക്കോളാസ് മഡൂറോയെ ന്യൂയോര്ക്കില് എത്തിച്ചു. അമേരിക്കന് ലഹരിവിരുദ്ധ സേനയുടെ താവളത്തില് എത്തിച്ച് ചോദ്യം ചെയ്യും. യുഎസ് കോടതിയില് വിചാരണ നേരിടും. ഇനി വെനസ്വേല അമേരിക്ക ഭരിക്കുമെന്നാണ് പ്രസിഡന്റ് ട്രംപിന്റെ പ്രഖ്യാപനം. മഡൂറോയുടെ അഭാവത്തില് വൈസ് പ്രസിഡന്റ് ഡെല്സി റോഡ്രിഗസ് അധികാരം ഏറ്റെടുത്തേക്കും. അമേരിക്കന് അധിനിവേശത്തില് കരുതലോടെയാണ് ലോകരാജ്യങ്ങളുടെ പ്രതികരണം. പല നഗരങ്ങളിലും പ്രതിഷേധ പ്രകടനങ്ങള് നടക്കുന്നുണ്ട്.
അമേരിക്ക ബന്ധിയാക്കിയ വെനസ്വേലന് പ്രസിഡന്റ് നിക്കോളാസ് മഡൂറോയുടെ ചിത്രം ട്രംപ് പുറത്തുവിട്ടു. യുഎസ് നാവികസേനാ കപ്പലിലുള്ള ചിത്രമാണ് പുറത്തുവിട്ടത്. കണ്ണുകെട്ടിയ നിലയിലുള്ള ചിത്രമാണ് പുറത്തുവട്ടത്. അമേരിക്ക ബന്ദിയാക്കിയ നിക്കോളാസ് മഡൂറോയും ഭാര്യ സിലിയ ഫ്ലോറസും അമേരിക്കയില് വിചാരണ നേരിടേണ്ടിവരുമെന്നും ട്രംപ് വ്യക്തമാക്കി.
വെനസ്വേലയിലെ അമേരിക്കന് കടന്നാക്രമണത്തില് നയം വ്യക്തമാക്കി പ്രസിഡന്റ് ഡോണള്ഡ് ട്രംപ്. ശരിയായ അധികാര കൈമാറ്റം പൂര്ത്തിയാകും വരെ കുറച്ചുകാലം വെനസ്വേല അമേരിക്ക ഭരിക്കുമെന്നും ആവശ്യമെങ്കില് വീണ്ടും ആക്രമിക്കുമെന്നും ട്രംപ് വാര്ത്താസമ്മേളനത്തില് വ്യക്തമാക്കി. മഡൂറോ ഏകാധിപതിയാണെന്നും പടിഞ്ഞാറന് അര്ദ്ധഗോളത്തില് അമേരിക്കന് ആധിപത്യം പുന:സ്ഥാപിച്ചെന്നും ട്രംപ് വ്യക്തമാക്കി. വെനസ്വേലയില് ആര്ക്ക് വേണമെങ്കിലും മഡൂറോയുടെ ഗതി വരാമെന്നും ട്രംപ് മുന്നറിയിപ്പ് നല്കി.
