നിക്കോളാസ് മഡുറോയെ അമേരിക്ക ബന്ദിയാക്കിയതിന് പിന്നാലെ പ്രസിഡന്റിന്റെ ചുമതല വൈസ് പ്രസിഡന്റ് ഡെല്സി റോഡ്രിഗസിന്. വെനസ്വേലന് സുപ്രീംകോടതിയുടെ ഭരണഘടന ചേംബര് ഇത് സംബന്ധിച്ച ഉത്തരവിറക്കി. വെനസ്വേലന് നിയമത്തിലെ ആര്ട്ടിക്കിള് 233, 234 പ്രകാരം പ്രസിഡന്റിന്റെ ആഭാവത്തില് പകരം ചുമതല വൈസ് പ്രസിഡന്റിനാണ്. ഇതിന്റെ അടിസ്ഥാനത്തിലാണ് നടപടി. വൈസ് പ്രസിഡന്റ് സ്ഥാനത്തിന് പുറമേ ധനകാര്യ, എണ്ണ വകുപ്പുകള് കൈകാര്യം ചെയ്തിരുന്നത് ഡെല്സി റോഡ്രിഗസായിരുന്നു.
മഡുറോയ്ക്കെതിരായ നടപടിക്ക് പിന്നാലെ ഡെല്സി റോഡ്രിഗസിന്റെ നേതൃത്വത്തില് ദേശീയ പ്രതിരോധ കൗണ്സില് യോഗം ചേര്ന്നിരുന്നു. മന്ത്രിമാരും മുതിര്ന്ന ഉദ്യോഗസ്ഥരും അടക്കം യോഗത്തില് പങ്കെടുത്തു. മഡുറോയ്ക്കെതിരായ നടപടിയെ യോഗം ശക്തമായി അപലപിച്ചു. മഡുറോയെയും ഭാര്യ സീലിയ ഫ്ളോറസിനെയും ഉടന് വിട്ടയക്കണ് യോഗം ആവശ്യപ്പെട്ടിരുന്നു. അമേരിക്കന് നടപടി അന്താരാഷ്ട്ര നിയമത്തിനും രാജ്യത്തിന്റെ പരമാധികാരത്തിനും മേലുള്ള കടന്നുകയറ്റമാണെന്നും ഡെല്സി പറഞ്ഞിരുന്നു. നടപടിയെ വെനസ്വേലന് ജനത തള്ളിക്കളയണം. ലാറ്റിന് അമേരിക്കന് രാജ്യന് വിഷയത്തില് ശക്തമായ നിലപാട് സ്വീകരിക്കണമെന്നും ഡെല്സി ആവശ്യപ്പെട്ടിരുന്നു.
മയക്കുമരുന്നുകള് കടത്തുണ്ടെന്ന് ആരോപിച്ച് മഡുറോയെ മാസങ്ങളായി വേട്ടയാടിയ ശേഷമായിരുന്നു രാജ്യത്ത് അതിക്രമിച്ച് കടന്ന് അമേരിക്ക അദ്ദേഹത്തെയും ഭാര്യയെയും ബന്ദിയാക്കിയത്. ശനിയാഴ്ച പുലര്ച്ചെ പ്രാദേശിക സമയം രണ്ടിന് യുഎസ് സേനയുടെ ഭീകരവിരുദ്ധ സേനയായ ഡെല്റ്റ ഫോഴ്സാണ് മഡുറോയെയും സീലിയെയും ബന്ദിയാക്കിയത്. കിടപ്പുമുറിയില് അതിക്രമിച്ച് നടന്നായിരുന്നു നടപടി. ഇതിന് തൊട്ടുമുന്പ് വെനസ്വേലയ്ക്ക് നേരെ അമേരിക്ക ശക്തമായ അക്രമണം നടത്തിയിരുന്നു. അമേരിക്കന് പ്രസിഡന്റ് ഡോണള്ഡ് ട്രംപ് തന്നെയായിരുന്നു മഡുറോയെയും ഭാര്യയെയും ബന്ദിയാക്കിയ വിവരം ട്രൂത്ത് സോഷ്യലിലൂടെ അറിയിച്ചത്. ഇതിന് ശേഷം വെനസ്വേല യുഎസ് ഭരിക്കുമെന്നും ട്രംപ് പറഞ്ഞിരുന്നു.
