അമ്മയുമായുള്ള അവിഹിത ബന്ധം പിതാവിനെ അറിയിച്ച 13 വയസ്സുകാരനെ പിതാവിന്റെ സഹോദരന് മഴു ഉപയോഗിച്ച് വെട്ടിക്കൊന്നു. മഹാരാഷ്ട്രയിലെ ധാരാശിവയിലാണ് സംഭവം. 24 മണിക്കൂറില് പോലീസ് പ്രതിയെ കണ്ടെത്തി അറസ്റ്റു ചെയ്തു. അമ്മയുമായുള്ള അവിഹിതബന്ധം തുടരുന്നതിന് കുട്ടി തടസ്സമാകുമെന്ന് കരുതിയാണ് കൊലപാതകം ആസൂത്രണം ചെയ്തതെന്ന് പോലീസ് പറഞ്ഞു.
ജനുവരി അഞ്ചിന് തുല്ജാപൂര് താലൂക്കിലെ തമല്വാഡി സംഭരണ റിസര്വോയറിന് സമീപം പുല്ലുകള്ക്കിടയില് ഒളിപ്പിച്ച നിലയില് കുട്ടിയുടെ മൃതദേഹം കണ്ടെത്തി. ജനുവരി ആറിന് കൊലപാതക കേസ് രജിസ്റ്റര് ചെയ്യുകയും 35കാരനായ പിതൃസഹോദരനെ അറസ്റ്റ് ചെയ്യുകയും ചെയ്തു.
തമല്വാഡി ശിവാറില് സോളാപൂര്-ധൂലെ ദേശീയ പാതയ്ക്ക് സമീപമുള്ള കൃഷിയിടത്തില് കര്ഷകതൊഴിലാളിയാണ് പ്രതിയെന്ന് പോലീസ് പറഞ്ഞു. കുട്ടിയുടെ അമ്മയും ഇവിടെ ജോലി ചെയ്തിരുന്നു. പിതാവിന്റെ സഹോദരന് അമ്മയുമായി അവിഹിത ബന്ധമുണ്ടെന്ന് കുട്ടിക്ക് അറിയാമായിരുന്നുവെന്ന് പോലീസ് പറഞ്ഞു. ''ഇക്കാര്യം കുട്ടി പിതാവിനെയും അറിയിച്ചിരുന്നു. കുട്ടി ഇവരുടെ ബന്ധത്തെക്കുറിച്ച് പതിവായി പിതാവിനോട് പറയാറുണ്ടായിരുന്നു. ഇതറിഞ്ഞ പ്രതി പ്രകോപിതനാകുകയും കുട്ടി തങ്ങളുടെ ബന്ധത്തിന് വലിയ തടസ്സമാണെന്ന് തിരിച്ചറിയുകയും ചെയ്തു,'' ധാരാശിവ് പോലീസ് സൂപ്രണ്ട് പറഞ്ഞു.
''ജനുവരി 1ന് ഉച്ചയോടെ ഒരു വൈദ്യുതി വാട്ടര് പമ്പിന് പൈപ്പ് ഇടാനെന്ന വ്യാജേന പ്രതി കുട്ടിയെ തമല്വാഡി സംഭരണിയ്ക്ക് സമീപത്തേക്ക് കൊണ്ടുപോയി. അവിടെ വെച്ച് പ്രതി കുട്ടിയെ മഴുവെച്ച് വെട്ടി വീഴ്ത്തി. കുട്ടി സംഭവസ്ഥലത്തുവെച്ച് തന്നെ മരിച്ചു. ഇതിന് ശേഷം പ്രതി സമീപത്തെ പുല്ലിനിടയില് കുട്ടിയുടെ മൃതദേഹം ഒളിപ്പിക്കുകയും അവിടെനിന്ന് കടന്നു കളയുകയും ചെയ്തു,'' പോലീസ് പറഞ്ഞു. പൊലീസിന് ലഭിച്ച രഹസ്യ വിവരം നിര്ണായകമായി.
