തെലങ്കാന സ്വദേശിയായ 80 വയസ്സുള്ള ഇന്ദ്രയ്യ തന്റെ സ്വന്തം കല്ലറ തയ്യാറാക്കി കഴിഞ്ഞു, അതും 12 ലക്ഷം രൂപ മുടക്കി. ജഗ്തിയാല് ജില്ലയിലെ ലക്ഷ്മിപൂരില് താമസിക്കുന്ന നക്ക ഇന്ദ്രയ്യ ജീവിച്ചിരിക്കുമ്പോള് തന്നെ സ്വന്തം ശവക്കുഴി നിര്മ്മിച്ചു, നാട്ടുകാര് അതിനെ ഒരു 'ഗ്രാനൈറ്റ് കൊട്ടാരം' എന്നാണ് വിശേഷിപ്പിക്കുന്നത്. ഏകദേശം 12 ലക്ഷം രൂപ ചെലവ് കണക്കാക്കുന്ന ശവക്കല്ലറയ്ക്ക് അഞ്ച് അടി ആഴവും ആറ് അടിയില് കൂടുതല് നീളവുമുണ്ട്, ഒരിക്കലും ജീര്ണിക്കാതിരിക്കാന് പൂര്ണ്ണമായും ഗ്രാനൈറ്റ് കൊണ്ടാണ് ഇത് നിര്മ്മിച്ചിരിക്കുന്നത്. അദ്ദേഹത്തിന്റെ മരിച്ച് പോയ ഭാര്യയുടെ ശവക്കുഴിക്ക് സമീപമാണ് തന്റെ ശവക്കല്ലറയും അദ്ദേഹം നിര്മ്മിച്ചിരിക്കുന്നത്. തമിഴ്നാട്ടില് നിന്ന് പ്രത്യേകം കൊണ്ടുവന്ന ഒരു കല്പ്പണിക്കാരായിരുന്നു ശവക്കല്ലറയുടെ നിര്മ്മാണം.
എല്ലാ ദിവസവും രാവിലെ ഇന്ദ്രയ്യ തന്റെ ശവക്കല്ലറയ്ക്ക് അടുത്തെത്തുന്നു. അല്പ നേരം അവിടെ ഇരിക്കും. ഭയമല്ല അപ്പോള് അദ്ദേഹത്തിന്റെ മുഖത്ത് പകരം എല്ലാം താന് ആഗ്രഹിച്ച രീതിയില് തന്നെ തയ്യാറാക്കിയിട്ടുണ്ടെന്നതിലുള്ള ആശ്വാസമാണ്. 'ഇത് ഞാന് സ്വയം കുഴിച്ച എന്റെ വീടാണ്. ഞാന് മരിച്ചതിന് ശേഷം, എന്നെ ഇവിടെ കിടത്തും, അതിനാല് ഞാന് ആഗ്രഹിച്ച രീതിയില് തന്നെ അത് നിര്മ്മിച്ചു,' എന്നാണ് അദ്ദേഹം ശവക്കല്ലറയെ കുറിച്ച് തന്നോട്ട് ചോദിക്കുന്നവരോട് പറയുന്നത്.
ഇന്ദ്രയ്യയുടെ കുട്ടിക്കാലം ഏറെ കഷ്ടപ്പാടുകള് നിറഞ്ഞതായിരുന്നു. 10 വയസ്സില് പിതാവ് മരിച്ചതോടെ അനാഥനായ ഇന്ദ്രയ്യ കുട്ടിക്കാലം മുതല് ജോലി ചെയ്തു തുടങ്ങി. പിന്നീട് 45 വര്ഷം ദുബായിലെ നിര്മ്മാണ മേഖലയില് ജോലി ചെയ്തു. ഇന്ത്യയിലേക്ക് മടങ്ങിയ ശേഷം അദ്ദേഹം തന്റെ സമ്പാദ്യം കൊണ്ടാണ് ജീവിച്ചത്. എന്നാല്, ഭാര്യയുടെ മരണശേഷം ഏകാന്തത അദ്ദേഹത്തെ പിടികൂടി. നാല് മക്കളുണ്ടെങ്കിലും തന്റെ അന്ത്യകര്മങ്ങള്ക്ക് അവരെ ആശ്രയിക്കില്ലെന്നാണ് അദ്ദേഹത്തിന്റെ തീരുമാനം. ആര്ക്കും ഒരു ഭാരമാകാന് ഞാന് ആഗ്രഹിക്കുന്നില്ലെന്ന് അദ്ദേഹം പറയുന്നു. 'മരണത്തെ ഭയപ്പെടേണ്ടതില്ല. എല്ലാവരും മരിക്കണം. എനിക്കും മരിക്കണം. കുറഞ്ഞപക്ഷം എന്നെ എവിടെ അടക്കം ചെയ്യുമെന്ന് എനിക്കറിയാം.' ശവക്കല്ലറയെ കുറിച്ച് അദ്ദേഹത്തിന്റെ മറുപടി ഇങ്ങനെയാണ്.
