നിത്യജീവിതത്തിലെ തിരക്കുകള്ക്കും ജോലിക്കുമിടയില് നിന്ന് മാറി, കുടുംബത്തോടൊപ്പം ഒത്തുകൂടാനും മനോഹരമായ നിമിഷങ്ങള് പങ്കുവെക്കാനുമായി ലിവര്പൂള് മലയാളി അസോസിയേഷന് (LMA)സംഘടിപ്പിച്ച ഈ വര്ഷത്തെ 'ഫാമിലി ഫണ് ഡേ' ചെസ്റ്ററില് വിജയകരമായി സമാപിച്ചു. ജൂലൈ 4-ന് നടന്ന യാത്രയില് നിരവധി കുടുംബങ്ങളാണ് പങ്കെടുത്തത്. കുട്ടികളുടെ ആവേശവും മുതിര്ന്നവരുടെ സജീവ പങ്കാളിത്തവും കൊണ്ട് ഒരേസമയം വിജ്ഞാനപ്രദവും ആനന്ദകരവുമായിരുന്നു ഈ ഒത്തുചേരല്.
പ്രധാന സന്ദര്ശന കേന്ദ്രങ്ങളായ ചെസ്റ്റര് കാസില് ആംഫി തിയേറ്റര്, ചരിത്രപ്രസിദ്ധമായ ചെസ്റ്റര് കത്തീഡ്രല് എന്നിവയുടെ നിര്മ്മാണ വൈദഗ്ധ്യവും പഴമയും കുട്ടികള്ക്ക് ഒരു പുതിയ അനുഭവമായിരുന്നു. നഗരത്തിന്റെ തിരക്കുകളില് നിന്ന് മാറി പ്രകൃതിയോട് ഇണങ്ങിനില്ക്കുന്ന Grosvenor പാര്ക്കിലെ പുല്ത്തകിടിയില് ഒത്തുകൂടിയ കുടുംബങ്ങള് പരസ്പരം വിശേഷങ്ങള് പങ്കുവെക്കാനും ഫോട്ടോകള് എടുക്കാനും സമയം കണ്ടെത്തി.
ചരിത്രവും പ്രകൃതിഭംഗിയും ഒന്നുചേരുന്ന ചെസ്റ്റര് നഗരത്തിന്റെ സാംസ്കാരിക പൈതൃകം അടുത്തറിയാന് സാധിച്ചതാണ് യാത്രയുടെ പ്രധാന ആകര്ഷണമെന്ന് പങ്കെടുത്തവര് അഭിപ്രായപ്പെട്ടു. ഉച്ചകഴിഞ്ഞു നടന്ന ഏറ്റവും ആകര്ഷകമായ റിവര് ക്രൂയിസ് ബോട്ട് യാത്രയും സൗഹൃദ സംഭാഷണങ്ങളും പ്രായഭേദമന്യേ എല്ലാവരും ഒരുപോലെ ആസ്വദിച്ചു.
മുതിര്ന്നവര്ക്ക് ഒത്തുചേരാനും വിശ്രമിക്കാനും സാധിച്ചപ്പോള്, ഡിജിറ്റല് സ്ക്രീനുകളില് നിന്ന് മാറി പ്രകൃതിയോടും കൂട്ടുകാരോടും ഒപ്പം സമയം ചെലവഴിക്കാന് സാധിച്ചതാണ് കുട്ടികളെ കൂടുതല് ആവേശഭരിതരാക്കിയത്. വൈകുന്നേരം 6 മണിയോടെയാണ് സന്ദര്ശന പരിപാടികള് ഔദ്യോഗികമായി അവസാനിച്ചത്.
പരസ്പരം സ്നേഹവും സന്തോഷവും പങ്കുവെക്കാന് കഴിഞ്ഞ ഈ ഒത്തുചേരല് വരും വര്ഷങ്ങളിലും കൂടുതല് വിപുലമായി സംഘടിപ്പിക്കുമെന്നും, സഹകരിച്ച എല്ലാ കുടുംബങ്ങള്ക്കും നന്ദി അറിയിക്കുന്നതായും സംഘാടക സമിതി അറിയിച്ചു.
