ബിഹാറിലെ നീറ്റ് പരീക്ഷയ്ക്കെതിരായ പ്രതിഷേധത്തില് വിദ്യാര്ത്ഥികള്ക്ക് നേരെ എകെ 47 തോക്ക് ഉപയോഗിച്ചു. പട്നയിലെ സിവാറില് നടന്ന പ്രതിഷേധത്തിനിടെയായിരുന്നു സംഭവം. ഐസയുടെ നേതൃത്വത്തിലായിരുന്നു പ്രതിഷേധം. വിഷയത്തില് പൊലീസ് ഉദ്യോഗസ്ഥനെതിരെ നടപടി സ്വീകരിച്ചിരിക്കുകയാണ്. വിദ്യാര്ഥികള്ക്ക് നേരെ എകെ 47 പ്രയോഗിച്ച ഉദ്യോഗസ്ഥനെതിരായാണ് നടപടി സ്വീകരിച്ചിരിക്കുന്നത്.
ബിഹാറിലെ പ്രത്യേക അന്വേഷണ സംഘത്തിലെ പൊലീസ് ഉദ്യോഗസ്ഥനായ അഭിഷേക് പട്ടേലിനെയാണ് സസ്പെന്ഡ് ചെയ്തത്. ഇതിന്റെ ദൃശ്യങ്ങള് അടക്കം പുറത്തു വന്നിട്ടുണ്ട്. ഇയാള് എകെ47 തോക്ക് ഉപയോഗിച്ച് വെടി ഉതിര്ക്കുന്നതും പിന്നാലെ വിദ്യാര്ത്ഥികള്ക്ക് നേരെ ആക്രോശിച്ച് പോകുന്നതും ദൃശ്യങ്ങളില് വ്യക്തമാണ്. ആദ്യം ആകാശത്തേക്കും പിന്നാലെ പ്രതിഷേധക്കാര്ക്ക് നേരെയും ആറ് റൗണ്ട് വെടിയുതിര്ത്തതായാണ് വിവരം. പിന്നാലെ പ്രതിപക്ഷ വിദ്യാര്ത്ഥി സംഘടനകള് അടക്കം വലിയ പ്രതിഷേധം ഉയര്ത്തിയിരുന്നു. എസ്എഫ്ഐ സംസ്ഥാന പ്രസിഡന്റ് കാന്തി കുമാരി അടക്കം ഇപ്പോഴും ജയില് വാസം അനുഭവിക്കുകയാണ്.
