യുകെയുടെ അഖണ്ഡതയ്ക്ക് വെല്ലുവിളിയാകുന്ന നിര്ണായക രാഷ്ട്രീയ നീക്കത്തിന് കാര്ഡിഫില് തുടക്കമാകുന്നു. യുകെയുടെ ഭാഗമായി തുടരണോ എന്നതില് ജനഹിതപരിശോധന നടത്താനുള്ള അവകാശം ആവശ്യപ്പെടുന്ന പ്രമേയത്തില് സ്കോട്ലന്ഡ്, വെയില്സ്, വടക്കന് അയര്ലന്ഡ് എന്നീ പ്രദേശങ്ങളിലെ ഭരണത്തലവന്മാര് ഒപ്പുവയ്ക്കുമെന്ന് ദ ടെലിഗ്രാഫ് റിപ്പോര്ട്ട് ചെയ്തു.
വെയില്സിന്റെ തലസ്ഥാനമായ കാര്ഡിഫില് തിങ്കളാഴ്ച നടക്കുന്ന ഉച്ചകോടിയിലാണ് നിര്ണായക കരാര് പരിഗണിക്കുന്നത്. സ്കോട്ലന്ഡ് ഫസ്റ്റ് മിനിസ്റ്റര് ജോണ് സ്വീനി, വെയില്സ് ഫസ്റ്റ് മിനിസ്റ്റര് എലുനെഡ് ആന്ഡേഴ്സണ്, വടക്കന് അയര്ലന്ഡ് ഫസ്റ്റ് മിനിസ്റ്റര് മിഷേല് ഒ നീല് എന്നിവര് യോഗത്തില് പങ്കെടുക്കും.
കരാര് നിലവില് വരുകയാണെങ്കില്, യുകെയില്നിന്ന് വേര്പിരിയണമോ എന്നതില് സ്വന്തം നിലയില് ജനഹിതപരിശോധന നടത്താനുള്ള അവകാശം ഈ മൂന്ന് പ്രദേശങ്ങള്ക്കും വേണമെന്നാണ് ആവശ്യം. ജനഹിതപരിശോധനയില് സ്വാതന്ത്ര്യത്തിന് അനുകൂലമായ വിധിയുണ്ടായാല് സ്കോട്ലന്ഡ്, വെയില്സ്, വടക്കന് അയര്ലന്ഡ് എന്നിവ യുകെയില്നിന്ന് വേര്പിരിയാനുള്ള വഴിയൊരുങ്ങും.
സ്വാതന്ത്ര്യം ലഭിച്ചാല് സ്കോട്ലന്ഡും വെയില്സും യൂറോപ്യന് യൂണിയനില് അംഗത്വം നേടാനുള്ള നീക്കം നടത്തുമെന്നും റിപ്പോര്ട്ടുകളുണ്ട്. വടക്കന് അയര്ലന്ഡ് അയര്ലന്ഡ് റിപ്പബ്ലിക്കുമായി ഏകീകരിക്കപ്പെട്ടാല് അതുവഴി സ്വാഭാവികമായും യൂറോപ്യന് യൂണിയന്റെ ഭാഗമാകുകയും ചെയ്യും.
സാമ്പത്തികം, ഊര്ജം, യൂറോപ്യന് യൂണിയനുമായുള്ള ബന്ധം, അന്താരാഷ്ട്ര സഹകരണം തുടങ്ങിയ മേഖലകളില് മൂന്ന് രാജ്യങ്ങളും പരസ്പരം സഹകരിക്കാനും പദ്ധതിയുണ്ട്.
ഇതിനിടെ, അയര്ലന്ഡ് സന്ദര്ശനത്തിനിടെ അമേരിക്കന് പ്രസിഡന്റ് ഡൊണാള്ഡ് ട്രംപ് വടക്കന് അയര്ലന്ഡും അയര്ലന്ഡ് റിപ്പബ്ലിക്കും ഒന്നിക്കുന്നതിനെ പരസ്യമായി പിന്തുണച്ചിരുന്നു. അയര്ലന്ഡ് ഏകീകരണം സ്വാഭാവികമായ കാര്യമാണെന്നും അത് ഉടന് നടക്കണമെന്നാണ് താന് ആഗ്രഹിക്കുന്നതെന്നും ട്രംപ് ഡബ്ലിനില് മാധ്യമങ്ങളോട് പറഞ്ഞിരുന്നു. ഇതിന് പിന്നാലെയാണ് കാര്ഡിഫ് ഉച്ചകോടിയിലെ നീക്കമെന്നതും ശ്രദ്ധേയമാണ്.
നിലവില് സ്കോട്ലന്ഡ്, വെയില്സ്, വടക്കന് അയര്ലന്ഡ് എന്നിവിടങ്ങളില് യുകെയില്നിന്നുള്ള കൂടുതല് സ്വയംഭരണത്തിനോ സ്വാതന്ത്ര്യത്തിനോ അനുകൂലമായ പ്രാദേശിക രാഷ്ട്രീയ ശക്തികള്ക്ക് സ്വാധീനമുണ്ട്. മൂന്ന് പ്രദേശങ്ങളിലും ഒരേസമയം ഇത്തരത്തിലുള്ള ഭരണനേതൃത്വം ശക്തമാകുന്നത് ലണ്ടന് വലിയ രാഷ്ട്രീയ വെല്ലുവിളിയാണ്.
എന്നാല് യുകെയില്നിന്ന് വേര്പിരിയുന്നതിനായി പുതിയ ജനഹിതപരിശോധനകള് നടത്താന് അനുമതി നല്കില്ലെന്ന നിലപാടിലാണ് ബ്രിട്ടീഷ് പ്രധാനമന്ത്രി ആന്ഡി ബേണ്ഹാം. അതിനാല് കാര്ഡിഫ് ഉച്ചകോടിയിലെ തീരുമാനങ്ങള് ലണ്ടനും പ്രാദേശിക ഭരണകൂടങ്ങളും തമ്മിലുള്ള ബന്ധത്തില് കൂടുതല് സംഘര്ഷത്തിന് വഴിവെച്ചേക്കും.
