രാഹുല് മാങ്കൂട്ടത്തില് എംഎല്എയുടെ അറസ്റ്റില് വൈകാരിക പ്രതികരണവുമായി ആദ്യ പരാതിക്കാരി. ദൈവത്തിന് നന്ദിയെന്നും വേദനകള്ക്കും വഞ്ചനകള്ക്കും ഇടയില് ദൈവം അംഗീകരിച്ചുവെന്നും അതിജീവിത സമൂഹമാധ്യമത്തിലൂടെ പ്രതികരിച്ചു. ഇരുട്ടില് എന്താണ് നടന്നതെന്ന് നീ കണ്ടു. ലോകം കേള്ക്കാതെ പോയ നിലവിളികള് നീ കേട്ടു, ഞങ്ങളുടെ ശരീരം ആക്രമിക്കപ്പെട്ടപ്പോഴും കുഞ്ഞുങ്ങളെ ബലം പ്രയോഗിച്ച് അടര്ത്തി മാറ്റിയപ്പോഴും നീ തുണയായെന്നും യുവതി പറയുന്നു.
തെറ്റായ ഒരാളെ അവരുടെ അച്ഛനായി തെരഞ്ഞെടുത്തതിന് വിശ്വസിച്ചതിന്, സ്വര്ഗത്തില് നിന്ന് മലാഖ കുഞ്ഞുങ്ങള് ഞങ്ങളോട് ക്ഷമിക്കുമായിരിക്കും. അവരുടെ ആത്മാവിന് ശാന്തി ലഭിക്കട്ടെയെന്നും അതിജീവിത കുറിച്ചു.
'പ്രിയപ്പെട്ട ദൈവമേ, ഞങ്ങള് സഹിച്ച എല്ലാ വേദനകളും, വഞ്ചനകളും അതിജീവിക്കാന് ധൈര്യം നല്കിയതിന് നന്ദി. ഇരുട്ടില് എന്താണ് നടന്നതെന്ന് നീ കണ്ടു. ലോകം കേള്ക്കാത്ത നിലവിളികള് നീ കേട്ടു. ഞങ്ങളുടെ ശരീരം ആക്രമിക്കപ്പെട്ടപ്പോഴും കുഞ്ഞുങ്ങളെ ബലം പ്രയോഗിച്ച് അടര്ത്തി മാറ്റിയപ്പോഴും നീ തുണയായി.സ്വര്ഗത്തില് നിന്ന് മലാഖ കുഞ്ഞുങ്ങള് ഞങ്ങളോട് ക്ഷമിക്കുമായിരിക്കും. തെറ്റായ ഒരാളെ അവരുടെ അച്ഛനായി തെരഞ്ഞെടുത്തതിന്. വിശ്വസിച്ചതിന്.
അവരുടെ ആത്മാവിന് ശാന്തി ലഭിക്കട്ടെ. ആക്രമണങ്ങളില് നിന്നും ഭയത്തില് നിന്നും അവര് മുക്തരാകട്ടെ. ഞങ്ങളുടെ കുഞ്ഞു മക്കളെ, ഞങ്ങളുടെ കണ്ണുനീര് സ്വര്ഗത്തില് എത്തുകയാണെങ്കില്, നിങ്ങളുടെ അമ്മ നിങ്ങളെ ഒരിക്കലും മറക്കില്ലെന്ന് ആ കണ്ണുനീര് പറയും.
നിങ്ങളുടെ സാന്നിധ്യം അത്രമേല് പ്രധാനപ്പെട്ടതാണ്. നമ്മള് ഇനിയും കാണുന്നത് വരെ അമ്മയുടെ ഹൃദയത്തില് നീ എന്നുമുണ്ടാകും.' എന്നാണ് കുറിപ്പ്.
വിവാഹവാഗ്ദാനം നല്കി പീഡിപ്പിച്ചുവെന്നും നിര്ബന്ധിത ഗര്ഭച്ഛിദ്രം നടത്തി എന്നുമായിരുന്നു രാഹുലിനെതിരായ ആദ്യ പരാതി. കുഞ്ഞ് വേണമെന്ന് നിര്ബന്ധിച്ച് രാഹുല്, യുവതി ഗര്ഭിണിയാണെന്ന് അറിഞ്ഞതിന് പിന്നാലെ ഗര്ഭച്ഛിദ്രത്തിന് നിര്ബന്ധിച്ചുവെന്ന് പരാതിയില് പറയഞ്ഞിരുന്നു. രാഹുല് യുവതിയെ ഭീഷണിപ്പെടുത്തുന്നതിന്റെയും ഗര്ഭച്ഛിദ്രത്തിന് നിര്ബന്ധിക്കുന്നതിന്റെയും ഫോണ് റെക്കോഡുകളും മെസേജുകളും പുറത്തുവന്നിരുന്നു.
