CURRENCY RATE -
1 GBP :
0.00 INR
1 EUR :
0.00 INR
1 USD :
0.00 INR
Last Updated :
9 Hours 26 Minutes 52 Seconds Ago
Breaking Now

യുക്മയുടെ മുന്‍ ദേശീയ പ്രസിഡന്റുമാര്‍ ഉള്‍പ്പെടെ ആറു പ്രമുഖര്‍ക്ക് വിശിഷ്ട സേവന പുരസ്‌കാരങ്ങള്‍; മന്ത്രി പി. സി. വിഷ്ണുനാഥ് ആദരിച്ചു....... ഡോ. ബിജു പെരിങ്ങത്തറ, മനോജ് പിള്ള, അലക്‌സ് വര്‍ഗീസ്, കുര്യന്‍ ജോര്‍ജ്ജ്, സ്മിത ബാബു തോട്ടം, റെയ്‌മോള്‍ നിധീരി എന്നിവര്‍ക്ക് ആദരം; യുക്മ ദേശീയ കലാമേളയുടെ ഉദ്ഘാടനവേദിയില്‍ നേതൃത്വമികവിനും ദീര്‍ഘകാല സംഘടനാ സേവനത്തിനും അംഗീകാരം

ചെല്‍റ്റന്‍ഹാം: യുകെയിലെ മലയാളി സമൂഹത്തിന്റെ സംഘടനാപരവും സാംസ്‌കാരികവും സാമൂഹികവുമായ വളര്‍ച്ചയ്ക്ക് വിലപ്പെട്ട സംഭാവനകള്‍ നല്‍കിയ യുക്മയുടെ മുന്‍ ദേശീയ പ്രസിഡന്റുമാര്‍ ഉള്‍പ്പെടെ ആറു പ്രമുഖ നേതാക്കളെ വിശിഷ്ട സേവന പുരസ്‌കാരങ്ങള്‍ നല്‍കി ആദരിച്ചു. നവംബര്‍ ഏഴ് ശനിയാഴ്ച ചെല്‍റ്റന്‍ഹാമിലെ ക്ലീവ് സ്‌കൂളില്‍ പ്രത്യേകം സജ്ജീകരിച്ച സലിംകുമാര്‍ നഗറില്‍ നടന്ന പതിനേഴാമത് യുക്മ ദേശീയ കലാമേളയുടെ ഔദ്യോഗിക ഉദ്ഘാടനച്ചടങ്ങില്‍ കേരള സാംസ്‌കാരിക, സിനിമ, ടൂറിസം വകുപ്പ് മന്ത്രി ശ്രീ. പി. സി. വിഷ്ണുനാഥാണ് പുരസ്‌കാരങ്ങള്‍ സമ്മാനിച്ചത്.

 

യുക്മയുടെ സംഘടനാ വളര്‍ച്ചയ്ക്കും പ്രവാസി മലയാളികളുടെ ക്ഷേമത്തിനും യുവജന ശാക്തീകരണത്തിനും സാംസ്‌കാരിക പ്രവര്‍ത്തനങ്ങള്‍ക്കും നല്‍കിയ ദീര്‍ഘകാല സേവനങ്ങളാണ് പുരസ്‌കാരങ്ങളിലൂടെ അംഗീകരിച്ചത്.

മുന്‍കാല ദേശീയ നേതൃത്വത്തില്‍ പ്രവര്‍ത്തിച്ചവരെയും നിലവിലെ ദേശീയ ഭാരവാഹികളെയും ഒരേ വേദിയില്‍ ആദരിച്ച ചടങ്ങ് യുക്മയുടെ സംഘടനാ ചരിത്രത്തിലെ ശ്രദ്ധേയമായ മുഹൂര്‍ത്തമായി.

 

ഡോ. ബിജു പെരിങ്ങത്തറയ്ക്ക് യുവജന ശാക്തീകരണത്തിനും സേവനമികവിനുമുള്ള പുരസ്‌കാരം

 

യുക്മ മുന്‍ ദേശീയ പ്രസിഡന്റും (2022-2025) നിലവിലെ യൂത്ത് കോര്‍ഡിനേറ്ററുമായ ഡോ. ബിജു പെരിങ്ങത്തറയ്ക്ക് 'എക്‌സലന്‍സ് ഇന്‍ സര്‍വീസ് ആന്‍ഡ് യൂത്ത് എംപവര്‍മെന്റ് അവാര്‍ഡ്' (Excellence in Service & Youth Empowerment Award) മന്ത്രി പി. സി. വിഷ്ണുനാഥ് സമ്മാനിച്ചു.

 

യുക്മയുടെ ദേശീയ നേതൃത്വത്തിലും യുവജന പ്രവര്‍ത്തനങ്ങളിലും നല്‍കിയ സംഭാവനകളെ മാനിച്ചാണ് പുരസ്‌കാരം.

യുക്മയുടെ പ്രവര്‍ത്തനങ്ങളില്‍ യുവതലമുറയുടെ പങ്കാളിത്തം പ്രോത്സാഹിപ്പിക്കുന്നതിനും സംഘടനയുടെ തുടര്‍ച്ചയായ വളര്‍ച്ചയ്ക്ക് നേതൃത്വം നല്‍കുന്നതിനുമുള്ള സേവനങ്ങള്‍ക്ക് ലഭിച്ച അംഗീകാരമായി പുരസ്‌കാരം മാറി.

 

മനോജ് പിള്ളയ്ക്ക് പ്രതിസന്ധികളെ അതിജീവിച്ച നേതൃത്വത്തിനും സാമൂഹിക സേവനത്തിനുമുള്ള പുരസ്‌കാരം

 

യുക്മ മുന്‍ ദേശീയ പ്രസിഡന്റും (2019-2022) നിലവിലെ ലെയ്‌സണ്‍ ഓഫീസറുമായ മനോജ് പിള്ളയ്ക്ക് 'എക്‌സലന്‍സ് ഇന്‍ റെസിലിയന്‍സ് ആന്‍ഡ് കമ്മ്യൂണിറ്റി അവാര്‍ഡ്' (Excellence in Resilience & Community Award) സമ്മാനിച്ചു.

 

പ്രതിസന്ധികളെ അതിജീവിച്ചുള്ള സംഘടനാ പ്രവര്‍ത്തനങ്ങള്‍ക്കും മലയാളി സമൂഹത്തോടുള്ള പ്രതിബദ്ധതയ്ക്കും നല്‍കിയ അംഗീകാരമാണ് ഈ പുരസ്‌കാരം.

2019 മുതല്‍ 2022 വരെ യുക്മ ദേശീയ പ്രസിഡന്റായി പ്രവര്‍ത്തിച്ച മനോജ് പിള്ളയുടെ നേതൃത്വപരമായ സേവനങ്ങളും സമൂഹത്തിനായി നല്‍കിയ സംഭാവനകളും ചടങ്ങില്‍ ആദരിക്കപ്പെട്ടു.

 

അലക്‌സ് വര്‍ഗീസിന് ദീര്‍ഘകാല സേവന പുരസ്‌കാരം

 

മലയാളി സമൂഹത്തോടുളള പ്രതിബന്ധതയ്ക്കും,

സംഘടനാ പ്രവര്‍ത്തനങ്ങളിലെ പ്രതിസന്ധി ഘട്ടങ്ങളില്‍ കരുത്തോടെ നേതൃത്വം നല്‍കിയ

യുക്മ മുന്‍ ദേശീയ ജനറല്‍ സെക്രട്ടറിയും (2019-2022) നിലവിലെ യുക്മ ചാരിറ്റി വൈസ് ചെയര്‍മാനുമായ അലക്‌സ് വര്‍ഗീസിന്  'ഡിസ്റ്റിംഗ്വിഷ്ഡ് ലോങ് സര്‍വീസ് അവാര്‍ഡ്' (Distinguished Long Service Award) മന്ത്രി സമ്മാനിച്ചു.

 

യുക്മയുടെ സംഘടനാ പ്രവര്‍ത്തനങ്ങളില്‍ ദീര്‍ഘകാലമായി നല്‍കിയ സേവനങ്ങള്‍ക്കുള്ള അംഗീകാരമാണ് പുരസ്‌കാരം.

ദേശീയ ജനറല്‍ സെക്രട്ടറിയെന്ന നിലയിലും, നാഷണല്‍ ട്രഷറര്‍, നാഷണല്‍ ജോയിന്റ് സെക്രട്ടറി, നാഷണല്‍ ജോയിന്റ് ട്രഷറര്‍, രണ്ടു ടേമുകളിലായി നാല് വര്‍ഷക്കാലം നാഷണല്‍  പി ആര്‍ ഒ & മീഡിയ കോര്‍ഡിനേറ്റര്‍, ദേശീയ സമിതിയംഗം തുടങ്ങിയ നിലകളില്‍ സംഘടനയുടെ പ്രവര്‍ത്തനങ്ങളില്‍ നിര്‍വഹിച്ച ഉത്തരവാദിത്തങ്ങളും നിലവില്‍ യുക്മ ചാരിറ്റിയിലൂടെ തുടരുന്ന  സേവനങ്ങളും ഈ ആദരവിന് പശ്ചാത്തലമായി.

 

 

കുര്യന്‍ ജോര്‍ജ്ജിന് സംഘടനാ സേവനമികവിനുള്ള പുരസ്‌കാരം

 

യുക്മ മുന്‍ ദേശീയ ജനറല്‍ സെക്രട്ടറിയും (2022-2025) നിലവിലെ ദേശീയ പി.ആര്‍.ഒ.യുമായ കുര്യന്‍ ജോര്‍ജ്ജിന് 'എക്‌സലന്‍സ് ഇന്‍ ഓര്‍ഗനൈസേഷണല്‍ സര്‍വീസ്' (Excellence in Organisational Service) പുരസ്‌കാരം നല്‍കി ആദരിച്ചു.

 

യുക്മയുടെ സംഘടനാപരമായ പ്രവര്‍ത്തനങ്ങള്‍ക്കും ദേശീയതലത്തിലുള്ള ഏകോപനത്തിനും നല്‍കിയ സംഭാവനകളെ മാനിച്ചാണ് പുരസ്‌കാരം..2022 മുതല്‍ 2025 വരെ ദേശീയ ജനറല്‍ സെക്രട്ടറിയായി പ്രവര്‍ത്തിച്ച കുര്യന്‍ ജോര്‍ജ്ജ്, നിലവില്‍ ദേശീയ പി.ആര്‍.ഒ. എന്ന നിലയിലും സംഘടനയുടെ പ്രവര്‍ത്തനങ്ങളില്‍ സജീവമാണ്.

 

സ്മിത ബാബു തോട്ടത്തിന് ഇവന്റ് നേതൃത്വത്തിനും സംഘാടക മികവിനുമുള്ള പുരസ്‌കാരം

 

യുക്മ ദേശീയ വൈസ് പ്രസിഡന്റ് സ്മിത ബാബു തോട്ടത്തിന് 'എക്‌സലന്‍സ് ഇന്‍ ഇവന്റ് ലീഡര്‍ഷിപ്പ് ആന്‍ഡ് ഓര്‍ഗനൈസേഷണല്‍ സര്‍വീസ്' (Excellence in Event Leadership & Organisational Service) പുരസ്‌കാരം മന്ത്രി സമ്മാനിച്ചു.

2026 മേയില്‍ നടന്ന യുക്മ നഴ്‌സസ് ഫോറം കണ്‍വെന്‍ഷന്റെ വിജയകരമായ സംഘാടനത്തിന് നല്‍കിയ നേതൃത്വവും സമര്‍പ്പണവും വിലപ്പെട്ട സംഭാവനകളും പരിഗണിച്ചാണ് പുരസ്‌കാരം നല്‍കിയത്.

 

യുകെയിലെ മലയാളി നഴ്‌സിങ് സമൂഹത്തെ ഒരുമിപ്പിക്കുന്ന യുക്മ നഴ്‌സസ് ഫോറത്തിന്റെ പ്രവര്‍ത്തനങ്ങള്‍ക്ക് നല്‍കിയ സംഘാടക പിന്തുണയ്ക്കും പരിപാടിയുടെ വിജയകരമായ നടത്തിപ്പിനും ലഭിച്ച പ്രത്യേക അംഗീകാരമായി ഈ ആദരം.

ദേശീയ വൈസ് പ്രസിഡന്റായ സ്മിത ബാബു തോട്ടത്തിന്റെ നേതൃത്വമികവും സംഘാടകശേഷിയും പുരസ്‌കാരത്തിലൂടെ അംഗീകരിക്കപ്പെട്ടു.

 

റെയ്‌മോള്‍ നിധീരിക്ക് സാംസ്‌കാരിക പരിപാടികളുടെ ഏകോപനത്തിനും നേതൃത്വത്തിനുമുള്ള പുരസ്‌കാരം

 

യുക്മ ദേശീയ ജോയിന്റ് സെക്രട്ടറി റെയ്‌മോള്‍ നിധീരിക്ക് 'എക്‌സലന്‍സ് ഇന്‍ കള്‍ച്ചറല്‍ പ്രോഗ്രാം കോര്‍ഡിനേഷന്‍ ആന്‍ഡ് ലീഡര്‍ഷിപ്പ്' (Excellence in Cultural Programme Coordination & Leadership) പുരസ്‌കാരം സമ്മാനിച്ചു.

 

2026 ഓഗസ്റ്റ് 15ന് നടന്ന യുക്മ കേരള പൂരം വള്ളംകളിയുടെയും ഇന്ത്യന്‍ സ്വാതന്ത്ര്യദിനാഘോഷങ്ങളുടെയും ഭാഗമായി സംഘടിപ്പിച്ച സാംസ്‌കാരിക പരിപാടികളുടെ വിജയകരമായ ഏകോപനത്തിനും നേതൃത്വത്തിനും നല്‍കിയ സംഭാവനകളാണ് പുരസ്‌കാരത്തിലൂടെ അംഗീകരിച്ചത്.

 

വിപുലമായ സാംസ്‌കാരിക പരിപാടികളുടെ ആസൂത്രണത്തിലും ഏകോപനത്തിലും പ്രകടിപ്പിച്ച സമര്‍പ്പണവും സംഘാടക മികവും പരിഗണിച്ചാണ് റെയ്‌മോള്‍ നിധീരിയെ ആദരിച്ചത്.

 

മുന്‍കാല നേതൃത്വത്തിനും നിലവിലെ ഭാരവാഹികള്‍ക്കും ഒരേ വേദിയില്‍ ആദരം

 

യുക്മയുടെ ചരിത്രത്തില്‍ വിവിധ കാലഘട്ടങ്ങളില്‍ ദേശീയ നേതൃത്വത്തില്‍ പ്രവര്‍ത്തിച്ചവരെയും നിലവില്‍ സംഘടനയുടെ പ്രവര്‍ത്തനങ്ങള്‍ക്ക് നേതൃത്വം നല്‍കുന്നവരെയും ആദരിച്ച ചടങ്ങിന് പ്രത്യേക പ്രാധാന്യമുണ്ടായിരുന്നു.

 

ഡോ. ബിജു പെരിങ്ങത്തറ, മനോജ് പിള്ള എന്നീ മുന്‍ ദേശീയ പ്രസിഡന്റുമാര്‍ക്കും അലക്‌സ് വര്‍ഗീസ്, കുര്യന്‍ ജോര്‍ജ്ജ് എന്നീ മുന്‍ ദേശീയ ജനറല്‍ സെക്രട്ടറിമാര്‍ക്കും ലഭിച്ച പുരസ്‌കാരങ്ങള്‍ സംഘടനയുടെ തുടര്‍ച്ചയായ വളര്‍ച്ചയില്‍ മുന്‍കാല നേതൃത്വം നല്‍കിയ സംഭാവനകള്‍ക്കുള്ള അംഗീകാരമായി.

 

അതോടൊപ്പം നിലവിലെ ദേശീയ വൈസ് പ്രസിഡന്റ് സ്മിത ബാബു തോട്ടം, ദേശീയ ജോയിന്റ് സെക്രട്ടറി റെയ്‌മോള്‍ നിധീരി എന്നിവര്‍ക്ക് ലഭിച്ച പുരസ്‌കാരങ്ങള്‍ സമീപകാലത്ത് യുക്മ സംഘടിപ്പിച്ച പ്രധാന പരിപാടികളുടെ വിജയത്തിന് പിന്നിലെ നേതൃത്വത്തെയും സംഘാടക മികവിനെയും ആദരിക്കുന്നതുമായി.

 

ദേശീയ കലാമേളയുടെ ഉദ്ഘാടനച്ചടങ്ങില്‍ പുരസ്‌കാരസമര്‍പ്പണം

 

പതിനേഴാമത് യുക്മ ദേശീയ കലാമേളയുടെ ഔദ്യോഗിക ഉദ്ഘാടനച്ചടങ്ങില്‍ മുഖ്യാതിഥിയായി പങ്കെടുത്ത മന്ത്രി പി. സി. വിഷ്ണുനാഥ് പരമ്പരാഗത നിലവിളക്ക് കൊളുത്തി കലാമേള ഉദ്ഘാടനം ചെയ്തു. യുക്മ ദേശീയ ജനറല്‍ സെക്രട്ടറി ജയകുമാര്‍ നായര്‍ സ്വാഗതം പറഞ്ഞ ചടങ്ങില്‍ ദേശീയ പ്രസിഡന്റ് അഡ്വ. എബി സെബാസ്റ്റ്യന്‍ അധ്യക്ഷത വഹിച്ചു.

 

ബ്രിട്ടന്‍സ് ഗോട്ട് ടാലന്റിലൂടെ അന്താരാഷ്ട്ര ശ്രദ്ധ നേടിയ യുവഗായിക സൗപര്‍ണിക നായര്‍ വിശിഷ്ടാതിഥിയായി പങ്കെടുത്ത് മനോഹരമായ ഗാനാലാപനത്തിലൂടെ ചടങ്ങിന് മാറ്റുകൂട്ടി.

ദേശീയ ട്രഷറര്‍ ഷീജോ വര്‍ഗീസ് നന്ദിപ്രകാശനം നടത്തി. തുടര്‍ന്ന് നടന്ന ഉപഹാരസമര്‍പ്പണ ചടങ്ങിലാണ് യുക്മയുടെ ആറു പ്രമുഖ നേതാക്കള്‍ക്ക് മന്ത്രി വിശിഷ്ട സേവന പുരസ്‌കാരങ്ങള്‍ സമ്മാനിച്ചത്.

 

യുക്മ ദേശീയ കലാമേള കണ്‍വീനറും വൈസ് പ്രസിഡന്റുമായ വര്‍ഗീസ് ഡാനിയല്‍, ജോയിന്റ് സെക്രട്ടറി സണ്ണിമോന്‍ മത്തായി, ജോയിന്റ് ട്രഷറര്‍ പീറ്റര്‍ താണോലില്‍ എന്നിവരും മറ്റ് ദേശീയ സമിതി അംഗങ്ങളും ചടങ്ങില്‍ സന്നിഹിതരായിരുന്നു.

 

 

യുകെയിലെ മലയാളി സമൂഹത്തിന്റെ കലാസാംസ്‌കാരിക പൈതൃകം സംരക്ഷിക്കുന്നതിനും യുവജനങ്ങള്‍ക്ക് അവസരങ്ങള്‍ ഒരുക്കുന്നതിനും സാമൂഹിക കൂട്ടായ്മ ശക്തിപ്പെടുത്തുന്നതിനും യുക്മ നടത്തുന്ന പ്രവര്‍ത്തനങ്ങളുടെ പിന്നില്‍ നിരവധി നേതാക്കളുടെയും പ്രവര്‍ത്തകരുടെയും നിസ്വാര്‍ത്ഥ സേവനമുണ്ട്.

 

സംഘടനയുടെ വിവിധ കാലഘട്ടങ്ങളില്‍ ഉത്തരവാദിത്തങ്ങള്‍ ഏറ്റെടുത്ത് പ്രവര്‍ത്തിച്ചവരുടെ സേവനങ്ങള്‍ അംഗീകരിക്കുന്ന ഇത്തരം പുരസ്‌കാരങ്ങള്‍, പുതിയ തലമുറയിലെ സാമൂഹിക പ്രവര്‍ത്തകര്‍ക്കും സംഘടനാ നേതൃത്വത്തിലേക്ക് കടന്നുവരുന്നവര്‍ക്കും പ്രചോദനമാകുന്നു.

 

യുക്മയുടെ മുന്‍ ദേശീയ പ്രസിഡന്റുമാര്‍ ഉള്‍പ്പെടെ ആറു പ്രമുഖര്‍ക്ക്  ലഭിച്ച വിശിഷ്ട സേവന പുരസ്‌കാരങ്ങള്‍, പതിനേഴാമത് യുക്മ ദേശീയ കലാമേളയുടെ ഉദ്ഘാടനച്ചടങ്ങിലെ ശ്രദ്ധേയമായ മുഹൂര്‍ത്തങ്ങളിലൊന്നായി മാറി. പ്രവാസി മലയാളി സമൂഹത്തിന്റെ വളര്‍ച്ചയ്ക്കായി നല്‍കിയ സേവനങ്ങളെയും സംഘടനാപരമായ സമര്‍പ്പണത്തെയും ആദരിച്ച ചടങ്ങ് യുക്മയുടെ സേവനപാരമ്പര്യത്തിന് നല്‍കിയ അംഗീകാരമായി.

 

 

ജയകുമാര്‍ നായര്‍ 

(യുക്മ ദേശീയ ജനറല്‍ സെക്രട്ടറി )

 




കൂടുതല്‍വാര്‍ത്തകള്‍.