ബ്രിട്ടനിലെ പ്രശസ്ത ടെലിവിഷന്‍ റിയാലിറ്റി ഷോയായ Britain's Got Talent ലൂടെ ലോകമെമ്പാടുമുള്ള സംഗീതപ്രേമികളുടെ ഹൃദയം കീഴടക്കിയ മലയാളി ഗായിക സൗപര്‍ണിക നായര്‍ പതിനേഴാമത് യുക്മ ദേശീയ കലാമേളയില്‍ സെലിബ്രിറ്റി അതിഥിയായി പങ്കെടുക്കും. നവംബര്‍ 07 ശനിയാഴ്ച ഗ്ലോസ്റ്റര്‍ഷെയറിലെ ചെല്‍റ്റന്‍ഹാം ക്ലീവ് സ്‌കൂളില്‍ പ്രത്യേകം സജ്ജീകരിക്കുന്ന സലിംകുമാര്‍ നഗറില്‍ നടക്കുന്ന ദേശീയ കലാമേളയിലാണ് സൗപര്‍ണിക നായര്‍ അതിഥിയായി എത്തുന്നത്.
കേരള സര്‍ക്കാരിലെ സാംസ്‌കാരിക, സിനിമ, ടൂറിസം വകുപ്പ് മന്ത്രി പി. സി. വിഷ്ണുനാഥ് മുഖ്യാതിഥിയായി പങ്കെടുക്കുകയും ഉദ്ഘാടനം നിര്‍വഹിക്കുകയും ചെയ്യുന്ന ദേശീയ കലാമേളയില്‍, ബ്രിട്ടീഷ് സംഗീതരംഗത്ത് ശ്രദ്ധേയമായ നേട്ടങ്ങള്‍ കൈവരിച്ച സൗപര്‍ണിക നായരുടെ സാന്നിധ്യം യുകെയിലെ മലയാളി സമൂഹത്തിനും കലാമേളയില്‍ പങ്കെടുക്കുന്ന നൂറുകണക്കിന് യുവകലാപ്രതിഭകള്‍ക്കും ആവേശകരമായ അനുഭവമായിരിക്കും.
പത്താം വയസ്സില്‍ Britain's Got Talent 2020 വേദിയിലെത്തിയ സൗപര്‍ണിക, The Greatest Showman എന്ന ചിത്രത്തിലെ പ്രശസ്ത ഗാനമായ 'Never Enough' ആലപിച്ച് വിധികര്‍ത്താക്കളുടെയും പ്രേക്ഷകരുടെയും പ്രശംസ നേടി. സമൂഹമാധ്യമങ്ങളില്‍ വൈറലായ ആ പ്രകടനം 150 ദശലക്ഷത്തിലധികം കാഴ്ചകള്‍ നേടിയതായാണ് സൗപര്‍ണികയുടെ ഔദ്യോഗിക ജീവചരിത്രത്തില്‍ വ്യക്തമാക്കുന്നത്. മത്സരത്തിന്റെ സെമിഫൈനലില്‍ എത്താനും ഈ മലയാളി ബാലപ്രതിഭയ്ക്ക് സാധിച്ചു.
BBC One സംപ്രേഷണം ചെയ്ത Michael McIntyre's Big Show എന്ന പരിപാടിയിലൂടെയും സൗപര്‍ണിക ശ്രദ്ധ നേടിയിരുന്നു. ലണ്ടനിലെ പ്രശസ്തമായ പല്ലാഡിയം തിയേറ്ററില്‍ 'I Dreamed a Dream' ആലപിച്ച സൗപര്‍ണികയ്ക്ക് സദസ്സിന്റെ എഴുന്നേറ്റുനിന്നുള്ള കരഘോഷം ലഭിച്ചു. പരിപാടിയിലെ ഏറ്റവും പ്രായം കുറഞ്ഞ 'Unexpected Star' എന്ന നേട്ടവും സൗപര്‍ണിക സ്വന്തമാക്കി.
സംഗീതരംഗത്തിനു പുറമെ മ്യൂസിക്കല്‍ തിയേറ്ററിലും സൗപര്‍ണിക തന്റെ കഴിവ് തെളിയിച്ചിട്ടുണ്ട്. ബ്രിട്ടനില്‍ പര്യടനം നടത്തിയ School of Rock മ്യൂസിക്കല്‍ പ്രൊഡക്ഷനില്‍ 'ടോമിക' എന്ന കഥാപാത്രത്തെ അവതരിപ്പിച്ച സൗപര്‍ണിക, അഭിനയത്തിലും ഗാനാലാപനത്തിലും ഒരുപോലെ ശ്രദ്ധ നേടി.
2025ല്‍ ബ്രിട്ടനിലെ പ്രമുഖ സംഗീതപരിപാടിയായ Young Voices-ല്‍ പ്രത്യേക അതിഥി കലാകാരിയായി പങ്കെടുത്ത സൗപര്‍ണിക, ലണ്ടനിലെ O2 അരീന, മാഞ്ചസ്റ്ററിലെ Co-op Live, വെംബ്ലിയിലെ OVO അരീന എന്നിവയുള്‍പ്പെടെയുള്ള പ്രശസ്ത വേദികളിലായി 33 സംഗീതപരിപാടികളുടെ ഭാഗമായിരുന്നു. ആയിരക്കണക്കിന് കുട്ടികള്‍ പങ്കെടുക്കുന്ന ഈ സംഗീതപരിപാടികളിലെ സൗപര്‍ണികയുടെ സാന്നിധ്യം യുവഗായികയുടെ കലാജീവിതത്തിലെ മറ്റൊരു ശ്രദ്ധേയമായ നേട്ടമായി.
CBBC Blue Peter, ITV, BBC Radio തുടങ്ങിയ പ്രമുഖ മാധ്യമങ്ങളിലൂടെയും സൗപര്‍ണികയുടെ സംഗീതം പ്രേക്ഷകരിലേക്കെത്തിയിട്ടുണ്ട്. ഏഷ്യാനെറ്റ് സ്റ്റാര്‍ സിംഗര്‍ ഉള്‍പ്പെടെയുള്ള ഇന്ത്യന്‍ ടെലിവിഷന്‍ പരിപാടികളിലും അതിഥി കലാകാരിയായി പങ്കെടുത്തിട്ടുണ്ട്.
സ്വന്തമായി ഗാനങ്ങള്‍ രചിക്കുകയും അവതരിപ്പിക്കുകയും ചെയ്യുന്ന സൗപര്‍ണികയുടെ 'Unbreakable' എന്ന ഒറിജിനല്‍ സിംഗിള്‍ BBC Music Introducing പരിപാടിയിലും ഇടം നേടിയിരുന്നു. സംഗീതരംഗത്തെ നേട്ടങ്ങള്‍ക്കുള്ള അംഗീകാരമായി 2025ല്‍ ലണ്ടനില്‍ നടന്ന We the Women പരിപാടിയില്‍ ഡോ. ശശി തരൂരില്‍നിന്ന് 'Changemaker 2025' പുരസ്‌കാരവും സൗപര്‍ണിക ഏറ്റുവാങ്ങി.
നിലവില്‍ ലണ്ടനില്‍ താമസിക്കുന്ന സൗപര്‍ണിക നായര്‍ പ്രശസ്തമായ The BRIT School-ലാണ് പഠനം നടത്തുന്നത്. കേരളീയ വേരുകളോടുള്ള ആത്മബന്ധം നിലനിര്‍ത്തിക്കൊണ്ടുതന്നെ ബ്രിട്ടീഷ് സംഗീതലോകത്ത് തന്റേതായ വ്യക്തിമുദ്ര പതിപ്പിക്കുന്ന ഈ യുവഗായിക, പ്രവാസി മലയാളികളുടെ പുതുതലമുറയ്ക്ക് പ്രചോദനമാണ്.
ഇംഗ്ലണ്ട്, വെയില്‍സ്, സ്‌കോട്ട്‌ലന്‍ഡ്, നോര്‍ത്തേണ്‍ അയര്‍ലന്‍ഡ് എന്നിവിടങ്ങളിലെ നൂറ്റി അറുപതിലേറെ മലയാളി അസോസിയേഷനുകളുടെ കൂട്ടായ്മയായ യുക്മ സംഘടിപ്പിക്കുന്ന ദേശീയ കലാമേള, പ്രവാസലോകത്തെ മലയാളികളുടെ ഏറ്റവും വലിയ കലാമത്സരങ്ങളില്‍ ഒന്നാണ്. ഒക്ടോബറില്‍ നടന്ന റീജിയണല്‍ കലാമേളകളില്‍ വിജയികളായ നൂറുകണക്കിന് കലാകാരന്മാരും കലാകാരികളുമാണ് ദേശീയ വേദിയില്‍ മാറ്റുരയ്ക്കുന്നത്.
ചെറുപ്രായത്തില്‍ കലാമത്സരങ്ങളിലൂടെ കഴിവ് തെളിയിച്ച് അന്താരാഷ്ട്ര വേദികളിലേക്ക് ഉയര്‍ന്ന സൗപര്‍ണിക നായര്‍ ദേശീയ കലാമേളയില്‍ അതിഥിയായി എത്തുന്നത്, മത്സരങ്ങളില്‍ പങ്കെടുക്കുന്ന കുട്ടികള്‍ക്ക് വലിയ പ്രചോദനമാകുമെന്ന് യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യന്‍ അറിയിച്ചു.
യുകെയിലെ മലയാളി സമൂഹത്തില്‍നിന്ന് വളര്‍ന്നുവന്ന് അന്താരാഷ്ട്ര സംഗീതവേദികളില്‍ ശ്രദ്ധേയമായ നേട്ടങ്ങള്‍ കൈവരിച്ച സൗപര്‍ണിക നായരുടെ സാന്നിധ്യം പതിനേഴാമത് ദേശീയ കലാമേളയുടെ പ്രത്യേക ആകര്‍ഷണങ്ങളിലൊന്നായിരിക്കുമെന്ന് ജനറല്‍ സെക്രട്ടറി ജയകുമാര്‍ നായര്‍ അഭിപ്രായപ്പെട്ടു.
യുക്മ സൗത്ത് വെസ്റ്റ് റീജിയണിന്റെ ആതിഥേയത്വത്തില്‍ ചെല്‍റ്റന്‍ഹാമില്‍ നടക്കുന്ന പതിനേഴാമത് ദേശീയ കലാമേള ചരിത്രവിജയമാക്കാനുള്ള വിപുലമായ ഒരുക്കങ്ങളാണ് പുരോഗമിക്കുന്നത്. അന്തരിച്ച പ്രശസ്ത മലയാള ചലച്ചിത്ര നടന്‍ സലിംകുമാറിന്റെ സ്മരണാര്‍ത്ഥം നാമകരണം ചെയ്ത സലിംകുമാര്‍ നഗര്‍ നവംബര്‍ 07ന് യുകെ മലയാളികളുടെ കലാസാംസ്‌കാരിക സംഗമവേദിയായി മാറും.
കേരളത്തിന്റെ കലാപാരമ്പര്യവും പ്രവാസി മലയാളികളുടെ പുതുതലമുറയുടെ കഴിവുകളും ആഘോഷിക്കുന്ന ഈ മഹത്തായ കലോത്സവത്തിലേക്ക് യുകെയുടെ വിവിധ ഭാഗങ്ങളില്‍നിന്നുള്ള കലാകാരന്മാരെയും കലാകാരികളെയും മാതാപിതാക്കളെയും അധ്യാപകരെയും കലാപ്രേമികളെയും യുക്മ പ്രവര്‍ത്തകരെയും ഹൃദയപൂര്‍വ്വം സ്വാഗതം ചെയ്യുന്നതായി യുക്മ ട്രഷറര്‍ ഷീജോ വര്‍ഗീസ്, ദേശീയ കലാമേള കണ്‍വീനര്‍ വര്‍ഗീസ് ഡാനിയല്‍ (വൈസ് പ്രസിഡന്റ്), സ്മിത തോട്ടം (വൈസ് പ്രസിഡന്റ്), സണ്ണിമോന്‍ മത്തായി (ജോയിന്റ് സെക്രട്ടറി), റെയ്‌മോള്‍ നിധീരി (ജോയിന്റ് സെക്രട്ടറി), പീറ്റര്‍ താണോലില്‍ (ജോയിന്റ് ട്രഷറര്‍) എന്നിവര്‍ അറിയിച്ചു.
കുര്യന്‍ ജോര്‍ജ്ജ്
(നാഷണല്‍ പി.ആര്‍.ഒ. & മീഡിയ കോര്‍ഡിനേറ്റര്‍)
