Breaking Now

കോവിഡ് മഹാമാരി വരുത്തിയ രണ്ടു മാസത്തെ ഇടവേളക്ക് ശേഷം യുക്മ സാംസ്‌ക്കാരിക വേദിയുടെ ജ്വാല ഇമാഗസിന്‍ ജൂലൈ ലക്കം പ്രസിദ്ധീകരിച്ചു

ജ്വാല ഇമാഗസിന്‍ വീണ്ടും വായനക്കാരിലേക്ക് എത്തുകയായി. പതിവ് പോലെ വായനക്കാരുടെ പ്രിയ എഴുത്തുകാരുടെ കാമ്പുള്ള രചനകളാല്‍ സമ്പന്നമാണ് ജൂലൈ ലക്കവും. കോവിഡ് എന്ന മഹാമാരി എത്രമാത്രം മനുഷ്യരുടെ ചിന്തകളെയും ജീവിതക്രമത്തെയും മാറ്റുമെന്ന് എഡിറ്റോറിയലില്‍   സൂചിപ്പിക്കുന്നു. ഓരോ മനുഷ്യനും സ്വന്തം ആരോഗ്യത്തെയും സ്വന്തം സുഖത്തെയും കുറിച്ച് മാത്രം ചിന്തിക്കാതെ മറ്റുള്ളവരുടെ ആരോഗ്യവും സുഖവും കൂടി ബന്ധപ്പെട്ടാണ് തങ്ങളുടെ ജീവിത സന്തോഷമെന്ന വലിയ ഒരു ചിന്തയാണ് മാനവ ലോകത്തിന്  ഈ മഹാമാരി നമ്മെ പഠിപ്പിക്കുന്നുവെന്നു എഡിറ്റോറിയലില്‍ ചീഫ് എഡിറ്റര്‍ റജി നന്തികാട്ട് തുടരുന്നു.

മലയാള സാഹിത്യത്തിലെ കലാപകാരിയായ എഴുത്തുകാരന്‍ പൊന്‍കുന്നം വര്‍ക്കിയെ അനുസ്മരിച്ചുകൊണ്ട് ആര്‍. ഗോപാലകൃഷ്ണന്‍ എഴുതിയ ശബ്ദിച്ചുകൊണ്ടേയിരിക്കും ആ കലപ്പ എന്ന ലേഖനം ആ മഹാനായ എഴുത്തുകാരന്റെ ജീവിതത്തിലേക്ക് നമ്മെ കൂട്ടിക്കൊണ്ടു പോകുന്നു. വായക്കാരുടെ പ്രിയ പംക്തി സ്മരണകളിലേക്ക് ഒരു മടക്കയാത്രയില്‍ ജോര്‍ജ്ജ് അറങ്ങാശ്ശേരി തന്റെ മുംബൈ ജീവിതത്തിലെ ചില അനുഭവങ്ങളും ചിന്തകളും മനോഹരമായി വിവരിക്കുന്നു 'എല്ലാം മാറുകയാണ്' എന്ന അധ്യായത്തില്‍.

പ്രമുഖ മലയാള സാഹിത്യകാരന്‍ ഒ. വി. വിജയന്റെ ഇഷ്ടഗാനമായ അറബിക്കടലൊരു മണവാളന്‍ എന്ന ഗാനത്തിന്റെ പിറവിയെക്കുറിച്ചു രസകരമായി വിവരിക്കുന്നു  രവി മേനോന്‍ തന്റെ ലേഖനത്തില്‍. യുകെ യില്‍ താമസിക്കുന്ന റോസിനാ പീറ്റി എഴുതിയ 'മണ്ണ് മധുരിക്കുമ്പോള്‍' എന്ന ലേഖനത്തില്‍ മനുഷ്യ ജീവിതത്തെ അടുത്തറിയാന്‍ എഴുത്തുകാരി ശ്രമിക്കുന്നു.

വായനക്കാരെ എന്നും ആകര്‍ഷിക്കുന്ന ജ്വാല ഇ മാഗസിന്റെ ഈ ലക്കത്തെ  കഥകളില്‍ പ്രമുഖ എഴുത്തുകാരി മേദിനി കൃഷ്ണന്‍ എഴുതിയ 'ഭ്രാന്തത്തി അമ്മാളു', സുനില്‍ പാഴൂപറമ്പില്‍ മത്തായിയുടെ 'നിറങ്ങളുടെ രാജകുമാരന്‍',  സജിത അനില്‍ രചിച്ച 'മുത്തശ്ശി'  യും  കവിത വിഭാഗത്തില്‍ പ്രബോധ്  ഗംഗോത്രിയുടെ 'അങ്കമൊരുക്കുന്നതാര്‍ക്ക് വേണ്ടി',  രാജു കാഞ്ഞിരങാട് എഴുതിയ 'കാലം', സിനി ശിവന്‍ എഴുതിയ 'വിരഹ പീഡിതന്‍' എന്നീ കവിതകളും അടങ്ങിയിരിക്കുന്നു.  ജ്വാല ഇ മാഗസിന്‍ ജൂലൈ ലക്കം വായിക്കുവാന്‍ താഴെ കൊടുത്തിരിക്കുന്ന ലിങ്കില്‍ പ്രെസ് ചെയ്യുക: 

 

https://issuu.com/jwalaemagazine/docs/july_2020  

 

 




കൂടുതല്‍വാര്‍ത്തകള്‍.