ലോകത്തിന് മുഴുവന് ദുരന്തം സമ്മാനിച്ച ചൈനയില് 'ന്യൂഡില്സ് ദുരന്തം'. ഫ്രീസറില് ഒരു വര്ഷത്തില് ഏറെ സൂക്ഷിച്ച ന്യൂഡില്സ് കഴിച്ച് ഒരു കുടുംബത്തിലെ ഒന്പത് പേരാണ് മരണമടഞ്ഞത്. ന്യൂഡില്സില് അടങ്ങിയിട്ടുള്ള കോണ് ഫ്ളോര് പുളിച്ചതോടെ ഇത് കഴിച്ച കുടുംബത്തിന് 'ബോംഗ്രെകിക്' ആസിഡ് മൂലമുള്ള വിഷം സമ്മാനിച്ചതാണ് ദുരന്തത്തിന് ഇടയാക്കിയത്.
ചൈനയിലെ നോര്ത്ത് ഈസ്റ്റേണ് പ്രവിശ്യയായ ഹെയിലോംഗ്ജിയാംഗിലെ ജിസി നഗരത്തില് നിന്നുള്ള കുടുംബത്തിലെ ഏഴ് പേര് ന്യൂഡില്സ് കഴിച്ച് അഞ്ച് ദിവസത്തിന് ശേഷം ഒക്ടോബര് 10ന് മരിച്ചു. ന്യൂഡില്സ് കഴിച്ച കുടുംബത്തിലെ അവസാന അംഗം ലീ തിങ്കളാഴ്ചയാണ് മരിച്ചത്. ഭാഗ്യത്തിന് കുടുംബത്തിലെ മൂന്ന് കുട്ടികള് ദുരന്തത്തില് നിന്നും രക്ഷപ്പെട്ടു.
കുടുംബം ഒത്തുചേര്ന്ന സമയത്ത് നല്കിയ ന്യൂഡില്സിന്റെ സ്വാദ് ഇഷ്ടപ്പെടാതെ വന്നതോടെയാണ് കുട്ടികള് ഇത് കഴിക്കാതെ പോയത്. ബോംഗ്രെകിക് ആസിഡ് ഏറെ അപകടകാരിയാണെന്ന് ഡിസീസ് കണ്ട്രോള് & പ്രിവന്ഷന് ഡയറക്ടര് ഗാവോ ഫെയി പറഞ്ഞു. ചീത്തയായ ഭക്ഷണം കഴിച്ച് മണിക്കൂറുകള്ക്കുള്ളില് ഈ ആസിഡ് പണിനടത്തും. വയറുവേദന, വിയര്പ്പ്, ശാരീരിക ആസ്വാസ്ഥ്യം, ചിലപ്പോള് കോമയിലേക്ക് വരെ കാര്യങ്ങള് ചെന്നെത്തി 24 മണിക്കൂറില് മരണവും സംഭവിക്കാം.
ലിവര്, കിഡ്നി, ഹാര്ട്ട്, ബ്രെയിന് എന്നിങ്ങനെയുള്ള അവയവങ്ങള്ക്ക് ഗുരുതര കേടുപാട് വരുത്താന് ഈ ആസിഡ് വിഷത്തിന് സാധിക്കുമെന്ന് ഗാവോ ഫെയി കൂട്ടിച്ചേര്ത്തു. ഉയര്ന്ന താപനിലയില് തിളപ്പിച്ചാലും ബോംഗ്രെകിക് ആസിഡിനെ ഇല്ലാതാക്കാന് കഴിയില്ല. തേങ്ങ പുളിച്ചാലും ഈ മാരകമായ ആസിഡ് രൂപപ്പെടാറുണ്ട്.