ജനുവരി മാസത്തില് മഞ്ഞും, ഐസും ലോകത്തിന്റെ വിവിധ ഭാഗങ്ങളില് പതിവ് കാഴ്ചയാണ്. എന്നാല് ആഫ്രിക്കന് മരുഭൂമിയിലും, മിഡില് ഈസ്റ്റിലെ മരുഭൂമികളിലും ഇത് പതിവ് കാര്യമല്ല. ഇക്കുറി സഹാറ മരുഭൂമിയില് മഞ്ഞ് പെയ്തതാണ് കാലാവസ്ഥാ നിരീക്ഷകരെ അമ്പരപ്പിക്കുന്നത്. സൗദി അറേബ്യയിലെ താപനില -2 സെല്ഷ്യസായി താഴുന്നതും കണ്ടു.
സൗദി അറേബ്യയിലെ മരുഭൂമി മഞ്ഞുപുതച്ച് കിടക്കുന്ന കാഴ്ച ആസ്വദിക്കാന് പ്രദേശവാസികളും, വിദേശികളും ഒരു പോലെ അസീര് മേഖലയിലെ മരുഭൂമിയിലെത്തിയെന്ന് ജിയോ ടിവി റിപ്പോര്ട്ട് ചെയ്തു. അള്ജീരിയന് മരുഭൂമിയിലും മഞ്ഞ് കണങ്ങള് രൂപംകൊണ്ടു. ഇവിടെ താപനില -3 സെല്ഷ്യസായി താഴ്ന്നു.
നോര്ത്തേണ് ആഫ്രിക്കയുടെ ഭൂരിഭാഗം മേഖലയും അടങ്ങുന്ന സഹാറ മരുഭൂമിയുടെ താപനില കാര്യമായ മാറ്റങ്ങള്ക്ക് വിധേയമാകുന്നുണ്ട്. കഴിഞ്ഞ നൂറുകണക്കിന് വര്ഷങ്ങളായി ഈ മാറ്റം സംഭവിച്ച് കൊണ്ടിരിക്കുകയാണ്. നിലവില് ഉണങ്ങിവരണ്ട് നില്ക്കുന്ന മരുഭൂമി ഏകദേശം 15,000 വര്ഷങ്ങള് പിന്നിടുമ്പോള് പച്ചപ്പ് പുതയ്ക്കുമെന്നാണ് പ്രതീക്ഷിക്കുന്നത്.
സൗദി അറേബ്യയിലെ അസീര് മേഖലയില് താപനില ഫ്രീസിംഗ് നിലയിലേക്ക് താഴ്ന്നിട്ട് അര നൂറ്റാണ്ട് പിന്നിടുകയാണ്. താപനില -2 സെല്ഷ്യസിലേക്ക് താഴ്ന്നപ്പോള് ചുറ്റും നിറഞ്ഞ മഞ്ഞില് നില്ക്കുന്ന ഒട്ടകങ്ങളുടെ അപൂര്വ്വ കാഴ്ചയും ഇപ്പോള് പുറത്തുവരുന്നുണ്ട്.