തൃണമൂല്‍ കോണ്‍ഗ്രസ് എംപിയും മുന്‍ ക്രിക്കറ്റ് താരവുമായ യൂസഫ് പഠാന്റെ ഒരു സോഷ്യല്‍മീഡിയ പോസ്റ്റ് വിവാദത്തിന് തിരികൊളുത്തിയിരിക്കുകയാണ്.
പശ്ചിമ ബംഗാളിലെ മാള്‍ഡയിലെ പുരാതനപള്ളിയെച്ചൊല്ലിയാണ് വിവാദം. താന്‍ അദീന മസ്ജിദിനു മുന്‍പിലാണെന്ന് പറഞ്ഞ് പഠാന്‍ എക്‌സില്‍ പോസ്റ്റ് ചെയ്ത ചിത്രങ്ങളാണ് വിവാദത്തിന് വഴിവച്ചത്.
'മാള്‍ഡയിലെ അദീന മസ്ജിദ്, പശ്ചിമ ബംഗാളിലെ, ഇല്യാസ് ഷാഹി രാജവംശത്തിലെ രണ്ടാമത്തെ ഭരണാധികാരിയായിരുന്ന സുുല്‍ത്താന്‍ സിക്കന്ദര്‍ ഷാ 14-ാം നൂറ്റാണ്ടില്‍ നിര്‍മ്മിച്ച ഒരു ചരിത്രപരമായ പള്ളിയാണിത്. 1373-1375 CE കാലഘട്ട
ത്തില്‍ നിര്‍മ്മിച്ച ഈ പള്ളി അക്കാലത്ത് ഇന്ത്യന്‍ ഉപഭൂഖണ്ഡത്തിലെ ഏറ്റവും വലിയ പള്ളിയായിരുന്നു, ഇത് ഈ പ്രദേശത്തിന്റെ വാസ്തുവിദ്യയിലെ പ്രൗഢി വിളിച്ചോതുന്നത് കൂടിയാണ്' എന്നാണ് പഠാന്‍ എക്‌സ് പോസ്റ്റില്‍ കുറിച്ചിരിക്കുന്നു.
തൃണമൂല്‍ എംപിയുടെ പോസ്റ്റിന് ബിജെപിയുടെ ബംഗാള്‍ ഘടകം നല്‍കിയ മറുപടിയാണ് ചര്‍ച്ചാവിഷയം. പോസ്റ്റിനു താഴെ ആദിനാഥ് ക്ഷേത്രം' എന്നാണ് ബിജെപി നല്‍കിയ മറുപടി. ഇതിനു താഴെ നിരവധി കമന്റുകളും നിറയുന്നുണ്ട്.
എംപി പറഞ്ഞ സ്മാരകം ഒരു ക്ഷേത്രത്തിന് മുകളിലാണ് നിര്‍മിച്ചിരിക്കുന്നതെന്നും അതിന് ചരിത്രപരമായ പ്രാധാന്യമുണ്ടെന്നും എക്‌സ് ഉപയോക്താക്കള്‍ പറയുന്നു.
കഴിഞ്ഞ വര്‍ഷം ഒരു സംഘം പുരോഹിതര്‍ പള്ളിക്കുള്ളില്‍ ഹൈന്ദവ പൂജാകര്‍മ്മങ്ങള്‍ നടത്തിയിരുന്നു. പൂജ നടത്തിയ വൃദ്ധാവനിലെ വിശ്വവിദ്യാ ട്രസ്റ്റ് പ്രസിഡന്റ് ഹിരണ്‍മോയ് ഗോസ്വാമി ദേവതകളെ കണ്ടെത്തിയതായും പള്ളി ഒരു ഹൈന്ദവ ക്ഷേത്രത്തിന് മുകളിലാണ് നിര്‍മ്മിക്കുന്നതെന്ന് അവകാശപ്പെടുത്തുകയും ചെയ്തു. ഇതിന് പിന്നാലെ നാട്ടുകാര്‍ പ്രശ്‌നമുണ്ടാക്കുകയും ആര്‍ക്കിയോളജിക്കല്‍ സര്‍വേ ഓഫ് ഇന്ത്യ ഗോസ്വാമിക്കെതിരെ കേസെടുക്കുകയുണ്ടായി.
ദേശീയ സ്മാരകമായി പ്രഖ്യാപിച്ചിരുന്ന ഈ പള്ളി പിന്നീട് അടച്ചുപൂട്ടാനും തീരുമാനിച്ചിരുന്നു. കൂടാതെ ഈ പരിസരത്തെല്ലാം സിസിടിവികളും പൊലീസ് ചെക്ക് പോസ്റ്റ് സ്ഥാപിച്ചു. എഎസ്‌ഐയുടെ ഔദ്യോഗിക വെബ്‌സൈറ്റില്‍ ഈ പള്ളിയെ കുറിച്ചുള്ള വിവരങ്ങള്‍ നല്‍കുന്നുണ്ട്.
