ഇറാനെതിരെയുള്ള സൈനിക നടപടികള്ക്കായി അമേരിക്ക ഇതുവരെ 37.5 ബില്യണ് യു.എസ് ഡോളര് (ഏകദേശം 3.61 ലക്ഷം കോടി രൂപ) ചെലവഴിച്ചതായി അമേരിക്കന് പ്രതിരോധ മന്ത്രാലയമായ പെന്റഗണ് വ്യക്തമാക്കി. തിങ്കളാഴ്ച സെനറ്റ് അപ്രോപ്രിയേഷന്സ് കമ്മിറ്റിക്ക് മുമ്പാകെ നല്കിയ വിശദീകരണത്തിലാണ് യു.എസ് പ്രതിരോധ സെക്രട്ടറി പീറ്റ് ഹെഗ്സെത്ത് സൈനിക നീക്കങ്ങളുടെ ഭീമമായ ചെലവുകളെക്കുറിച്ചുള്ള വിവരങ്ങള് വെളിപ്പെടുത്തിയത്. സെപ്റ്റംബര് 30-ഓടെ ഈ സാമ്പത്തിക വര്ഷം അവസാനിക്കുമ്പോഴേക്കും പ്രതീക്ഷിക്കുന്ന മൊത്തം ചെലവുകള് കൂടി ഉള്പ്പെടുത്തിയാണ് പെന്റഗണ് പുതിയ കണക്കുകള് പുറത്തുവിട്ടിരിക്കുന്നത്. മുന്പ് കണക്കാക്കിയിരുന്നതിനേക്കാള് 8 ബില്യണ് ഡോളറിന്റെ വര്ദ്ധനവാണ് നിലവില് രേഖപ്പെടുത്തിയിരിക്കുന്നത്.
സൈനിക ചെലവുകള് പെട്ടെന്ന് ഉയര്ന്ന പശ്ചാത്തലത്തില്, യുദ്ധത്തിനായി കൂടുതല് തുക വകയിരുത്തിയില്ലെങ്കില് യു.എസ് സൈന്യത്തിന്റെ ഭാവി പരിശീലന പരിപാടികള് വെട്ടിച്ചുരുക്കേണ്ടി വരുമെന്ന് പീറ്റ് ഹെഗ്സെത്ത് മുന്നറിയിപ്പ് നല്കി. നിലവിലെ പ്രതിസന്ധി പരിഹരിക്കുന്നതിനായി 67 ബില്യണ് ഡോളറിലധികം വരുന്ന അനുബന്ധ ബജറ്റ് വിഹിതം അടിയന്തരമായി അനുവദിക്കണമെന്ന് പെന്റഗണ് യു.എസ് കോണ്ഗ്രസിനോട് ആവശ്യപ്പെട്ടിട്ടുണ്ട്. ഈ മാസമാദ്യം ഇറാനെതിരെയുള്ള വ്യോമാക്രമണങ്ങള് അമേരിക്ക പുനരാരംഭിച്ച ശേഷം ഇതാദ്യമായാണ് പ്രതിരോധ ചെലവുകളെക്കുറിച്ച് ഔദ്യോഗികമായി കണക്കുകള് പുറത്തുവിട്ടത്.
അമേരിക്കന് ജനപ്രതിനിധി സഭയിലേക്ക് തിരഞ്ഞെടുപ്പ് അടുത്തിരിക്കെ, പൊതുജനങ്ങള്ക്ക് താല്പ്പര്യമില്ലാത്ത യുദ്ധവും അതിനായി ചെലവഴിക്കുന്ന കോടാനുകോടി ഡോളറും രാജ്യത്ത് വലിയ ചര്ച്ചയായിട്ടുണ്ട്.
