പാലക്കാട് കല്ലേക്കാട് വ്യാസ വിദ്യാപീഠത്തിലെ ഹോസ്റ്റലില് പ്ലസ് വണ് വിദ്യാര്ത്ഥിനി ആത്മഹത്യ ചെയ്ത സംഭവത്തില് ഗുരുതര ആരോപണങ്ങളുമായി കുടുംബം. രുദ്ര ആത്മഹത്യ ചെയ്തത് സീനിയര് വിദ്യാര്ത്ഥിനികളുടെ റാഗിങിനെ തുടര്ന്നാണെന്നാണ് കുടുംബത്തിന്റെ പരാതി.
സീനിയര് വിദ്യാര്ത്ഥികള് മകളെ മര്ദിക്കാന് ശ്രമിച്ചിരുന്നു. കഴിഞ്ഞദിവസം ഫോണില് ബന്ധപ്പെട്ടപ്പോള് മകള് ഇക്കാര്യങ്ങള് അറിയിച്ചിരുന്നു. ഹോസ്റ്റല് വാര്ഡന് ഇതെല്ലാം അറിയാമെന്ന് രുദ്രയുടെ അച്ഛന് രാജേഷ് പറഞ്ഞു. സംഭവത്തില് സമഗ്ര അന്വേഷണം ആവശ്യപ്പെട്ട് മുഖ്യമന്ത്രി പിണറായി വിജയനും വിദ്യാഭ്യാസ വകുപ്പ് മന്ത്രി വി ശിവന്കുട്ടിക്കും കുടുംബം പരാതി നല്കി.
ഇന്നലെ രാത്രിയാണ് കല്ലേക്കാട് വ്യാസ വിദ്യാപീഠം സ്കൂളിലെ പ്ലസ് വണ് വിദ്യാര്ത്ഥിനിയായ രുദ്രയെ ഹോസ്റ്റല് മുറിയില് ആത്മഹത്യ ചെയ്ത നിലയില് കണ്ടെത്തിയത്. ഹോസ്റ്റലില് ഇന്നലെ രാത്രി ഒമ്പതോടെയാണ് വിദ്യാര്ത്ഥിനിയെ തൂങ്ങിമരിച്ച നിലയില് കണ്ടെത്തിയത്. ഹോസ്റ്റലിലെ മറ്റുകുട്ടികളാണ് ആദ്യം മൃതദേഹം കണ്ടത്. സംഭവത്തില് പാലക്കാട് ടൗണ് നോര്ത്ത് പൊലീസ് അന്വേഷണം ആരംഭിച്ചിട്ടുണ്ട്. കുടുംബത്തിന്റെ പരാതിയില് പൊലീസ് സ്കൂളിലെത്തി അന്വേഷണം നടത്തും. മരിച്ച രുദ്രയുടെ സഹപാഠികളില് നിന്നും അധ്യാപകരില് നിന്നും മൊഴി രേഖപ്പെടുത്തും.
അതേസമയം കുടുംബത്തിന്റെ ആരോപണം സ്കൂള് അധികൃതര് നിഷേധിച്ചു. റാഗിങുമായി ബന്ധപ്പെട്ട് വിദ്യാര്ത്ഥിയോ കുടുംബമോ പരാതി നല്കിയിട്ടില്ലെന്ന് സ്കൂള് അധികൃതര് അറിയിച്ചു.
