സോഷ്യല് മീഡിയ ഇന്ഫ്ലുവന്സര് രേഷ്മ എന്ന ചിന്നു പാപ്പുവിന്റെ മരണത്തില് വ്യക്തത വരുത്താന് പൊലീസ്. ചിന്നു ജീവനൊടുക്കിയത് ആണ്സുഹൃത്തുമായുള്ള തര്ക്കത്തിന് പിന്നാലെയെന്നാണ് കുടുംബത്തിന്റെ ആരോപണം. യുവാവിന്റെ മൊഴി പൊലീസ് രേഖപ്പെടുത്തിയേക്കും. ഇന്നലെയാണ് യുവതിയെ വാടക വീട്ടില് തൂങ്ങിമരിച്ച നിലയില് കണ്ടെത്തിയത്. കുടുംബപ്രശ്നമാണ് ആത്മഹത്യയിലേക്ക് നയിച്ചത് എന്നായിരുന്നു ആദ്യഘട്ടത്തില് പുറത്തുവന്ന വിവരം. എന്നാല് കുടുംബം ഇത് നിഷേധിക്കുകയായിരുന്നു.
വളരെ കാലമായി ഭര്ത്താവുമായി അകന്നുകഴിയുകയായിരുന്ന ചിന്നു കാസര്കോട് പൊലീസ് സ്റ്റേഷന് പരിധിയില് വരുന്ന ആസാദ് നഗറിലെ ക്വാട്ടേഴ്സില് വാടകയ്ക്ക് കഴിയുകയായിരുന്നു. ഇതിനിടെ യുവതി ഒരു യുവാവുമായി അടുപ്പത്തിലായിരുന്നു. ഇരുവരും ഒരുമിച്ചായിരുന്നു താമസം. ഇയാളുമായുള്ള ചില തര്ക്കമാണ് ആത്മഹത്യയിലേക്ക് നയിച്ചത് എന്നാണ് ആരോപണം. ഇതേ കുറിച്ച് ഫോണ് അടക്കം പരിശോധിച്ച് കൂടുതല് വിവരങ്ങള് ശേഖരിക്കാനാണ് പൊലീസിന്റെ നീക്കം.
ഇന്നലെ ഉച്ചകഴിഞ്ഞാണ് ചിന്നു പാപ്പുവിനെ മരിച്ച നിലയില് കണ്ടെത്തിയത്. തുടര്ച്ചയായി വിളിച്ചിട്ടും ഫോണ് എടുക്കാത്തതിനെ തുടര്ന്ന് ആണ്സുഹൃത്ത് മുറിയിലെത്തി നോക്കിയപ്പോഴാണ് ചിന്നുവിനെ മുറിയില് തൂങ്ങിമരിച്ച നിലയില് കണ്ടെത്തിയത്. ഉച്ച കഴിഞ്ഞ് മൂന്ന് മണിയോടെ മറ്റൊരാള്ക്കൊപ്പമാണ് സുഹൃത്ത് ചിന്നുവിന്റെ മുറിയിലെത്തിയത്. പിന്നാലെ ആശുപത്രിയിലെത്തിച്ചെങ്കിലും അപ്പൊഴേക്കും മരണം സംഭവിച്ചിരുന്നു. ആണ്സുഹൃത്ത് രാവിലെ ജോലിക്ക് പോയിരുന്നു. ഇടയ്ക്ക് ചിന്നുവിനെ വിളിച്ച് നോക്കിയെങ്കിലും ഫോണ് എടുത്തില്ല. ഉച്ചയ്ക്ക് വിളിച്ചപ്പോളും ഫോണ് എടുക്കാതെ വന്നപ്പോളാണ് ഇയാള് സുഹൃത്തിനെയും കൂട്ടി റൂമിലെത്തിയത്.
