ഇന്ത്യന് ഉല്പന്നങ്ങള്ക്കുമേല് ചുമത്തിയിരുന്ന 25 ശതമാനം തീരുവ നീക്കം ചെയ്ത് അമേരിക്കന് കസ്റ്റംസ് ആന്റ് ബോര്ഡര് പ്രൊട്ടക്ഷന് വിജ്ഞാപനം ഇറക്കി. ഫെബ്രുവരി ഏഴിനും ഏഴിനുശേഷവും അമേരിക്കയിലേക്ക് ഇറക്കുമതി ചെയ്യുന്ന ഉല്പന്നങ്ങള്ക്കാണ് തീരുവ നീക്കം ചെയ്തത്. കഴിഞ്ഞ വെള്ളിയാഴ്ചയാണ് റഷ്യന് എണ്ണ വാങ്ങുന്നതിന്റെ പേരില് ഇന്ത്യയ്ക്കുമേല് ചുമത്തിയ 25 ശതമാനം പിഴത്തീരുവ ഒഴിവാക്കിയ എക്സിക്യൂട്ടീവ് ഉത്തരവില് അമേരിക്കന് പ്രസിഡന്റ് ഡോണള്ഡ് ട്രംപ് ഒപ്പിട്ടത്. ഇതോടെ ഇന്ത്യയ്ക്കുമേലുള്ള തീരുവ 18 ശതമാനമായി മാറി.
നേരത്തെ, റഷ്യ-യുക്രെയ്ന് യുദ്ധ പശ്ചാത്തലത്തില് റഷ്യയില് നിന്ന് എണ്ണ വാങ്ങുന്ന രാജ്യങ്ങള്ക്കെതിരെ ട്രംപ് ഭരണകൂടം കര്ശന നിലപാട് സ്വീകരിച്ചിരുന്നു. ഇതിന്റെ ഭാഗമായാണ് ഇന്ത്യക്ക് മേല് അധിക നികുതി ചുമത്തിയത്. എന്നാല്, പ്രധാനമന്ത്രി നരേന്ദ്ര മോദിയും ട്രംപും തമ്മില് നടന്ന ചര്ച്ചകള്ക്കൊടുവില് നികുതി കുറയ്ക്കാന് ധാരണയാവുകയായിരുന്നു. ഇന്ത്യ വീണ്ടും റഷ്യയില് നിന്ന് എണ്ണ വാങ്ങാന് തുടങ്ങിയാല് പിന്വലിച്ച നികുതികള് പുനഃസ്ഥാപിക്കുമെന്നും അമേരിക്കന് ഭരണകൂടം മുന്നറിയിപ്പ് നല്കിയിട്ടുണ്ട്.
