ആരോഗ്യമന്ത്രി വീണാ ജോര്ജിനെതിരെ കണ്ണൂര് റെയില്വേ സ്റ്റേഷനില് കരിങ്കൊടി പ്രതിഷേധം നടത്തിയ കെഎസ്യു പ്രവര്ത്തകന്റെ വീടിന് നേരെ സ്ഫോടക വസ്തു എറിഞ്ഞതായി പരാതി. കോഴിക്കോട് ജില്ലാ സെക്രട്ടറി ബിതുല് ബാലന്റെ വീടിന് തിരുവള്ളൂരിലെ നേരെയാണ് സ്ഫോടക വസ്തു എറിഞ്ഞത്. വടകര പൊലീസ് കേസെടുത്തു. ബോംബേറ് ആണ് വീടിന് നേരെ ഉണ്ടായതെന്നാണ് എഫ്ഐആറില് പറയുന്നത്.
പുലര്ച്ചെ 2.30ഓടെയാണ് സംഭവം. വീടിന്റെ ജനല് ചില്ലുകള് തകര്ന്നു. മന്ത്രിക്കെതിരെ കരിങ്കൊടി കാണിക്കുകയും പ്രതിഷേധത്തിനിടെ മന്ത്രിക്ക് പരിക്കേല്ക്കുകയും ചെയ്തെന്ന കേസില് റിമാന്ഡിലാണ് ബിതുല്. ബിതുലിന് പുറമെ എം സി അതുല്, സി എച് മുബാസ്, മുഹമ്മദ് യാസീന്, അക്ഷയ് മാട്ടൂല് എന്നിവരും റിമാന്ഡിലാണ്.
കെഎസ്യു പ്രവര്ത്തകര് ആയുധം ഉപയോഗിച്ച് അക്രമിച്ചെന്നാണ് എഫ്ഐആറില് ഉള്ളത്. 'കൊല്ലെടാ' എന്ന് അക്രോശിച്ചാണ് പ്രവര്ത്തകര് എത്തിയതെന്നും മന്ത്രിക്ക് നേരെ ചാടി വീണ് കഴുത്തിന് അക്രമിക്കുകയായിരുന്നുവെന്നും എഫ്ഐആറില് പറയുന്നുണ്ട്. മന്ത്രിയെ അക്രമിക്കുന്നത് തടയാന് ശ്രമിച്ച ഗണ്മാനെയും അക്രമിച്ചതായി എഫ്ഐആറില് ഉണ്ട്. മന്ത്രിയുടെ ഗണ്മാന് എം എസ് അഭിലാഷ് നല്കിയ മൊഴിയുടെ അടിസ്ഥാനത്തിലാണ് പെലീസ് കേസെടുത്തത്.
അതേസമയം വീണാ ജോര്ജ് ആശുപത്രി വിട്ടു. ഇന്ന് പുലര്ച്ചെ നാല് മണിയോടെയാണ് കണ്ണൂര് പരിയാരം മെഡിക്കല് കോളേജില്നിന്നും മന്ത്രിയെ ഡിസ്ചാര്ജ് ചെയ്തത്. കണ്ണൂരില് നിന്ന് ഔദ്യോഗിക വാഹനത്തില് റോഡ് മാര്ഗം മന്ത്രി തലസ്ഥാനത്തേക്ക് തിരിക്കുകയായിരുന്നു. തുടര് ചികിത്സകള് തിരുവനന്തപുരം മെഡിക്കല് കോളെജില് നടക്കും
