രണ്ടര വയസ്സുകാരിയുടെ മരണത്തില് ചികിത്സാ പിഴവ് ഉണ്ടായിട്ടില്ലെന്ന് മമല് ആശുപത്രിയിലെ ഡോക്ടര് അരുണ് വാരിയര്. ഇഞ്ചക്ഷന് മൂലമല്ല കുട്ടിയുടെ ആരോഗ്യനില വഷളായതെന്ന് ഡോക്ടര് പറഞ്ഞു. ആശുപത്രിയില് എത്തിച്ചപ്പോള് തന്നെ കുട്ടിക്ക് കടുത്ത ശ്വാസംമുട്ടല് ഉണ്ടായിരുന്നു. ആരോഗ്യനില വഷളായതിനെ തുടര്ന്ന് കുട്ടിക്ക് അഡ്രിനാലിന് നല്കി. നെയ്യാര് മെഡിസിറ്റിയില് എത്തിച്ചപ്പോള് കുട്ടിക്ക് നേരിയ പള്സ് ഉണ്ടായിരുന്നതായും ഡോക്ടര് പറഞ്ഞു. അതേസമയം, മമല് ആശുപത്രിയില് ഉണ്ടായ ചികിത്സാ പിഴവാണ് മരണകാരണമെന്ന് ആവര്ത്തിക്കുകയാണ് കുട്ടിയുടെ കുടുംബം.
ഐഷ ഫാത്തിമയുടെ പോസ്റ്റ്മോര്ട്ടം ഇന്ന് തിരുവനന്തപുരം മെഡിക്കല് കോളേജില് നടക്കും. നെയ്യാര് മെഡിസിറ്റിയില് നിന്ന് മൃതദേഹം മെഡിക്കല് കോളേജില് എത്തിക്കും. പോസ്റ്റ്മോര്ട്ടത്തിനു ശേഷമേ മരണകാരണം വ്യക്തമാവുകയുള്ളൂ. തിരുവനന്തപുരം ചക്കിപ്പാറ സ്വദേശി സിദ്ദിഖിന്റെ മകള് രണ്ടര വയസുള്ള ഐഷാ ഫാത്തിമയാണ് മരിച്ചത്. സംഭവത്തില് കാട്ടാക്കടയിലെ മമല് ആശുപത്രിക്കെതിരെ മാതാപിതാക്കള് പൊലീസില് പരാതി നല്കുകയായിരുന്നു.
കുട്ടിക്ക് ശ്വാസംമുട്ടലും തളര്ച്ചയും അനുഭവപ്പെട്ടതിനെ തുടര്ന്ന് കാട്ടാക്കട മമല് ആശുപത്രിയില് എത്തിക്കുകയായിരുന്നു. ശ്വാസ തടസ്സത്തിന് ആവി പിടിച്ചശേഷം കുട്ടിക്ക് രണ്ട് ഇഞ്ചക്ഷന് എടുത്തു. ഇഞ്ചക്ഷന് എടുത്ത ശേഷം കുട്ടിയുടെ നില വഷളായതായാണ് കുടുംബം പരാതിയില് പറയുന്നത്. കുട്ടിയെ ആംബുലന്സില് ഉടന് നെയ്യാര് മെഡിസിറ്റിയില് എത്തിച്ചെങ്കിലും ഡോക്ടര്മാര് മരണം സ്ഥിരീകരിക്കുകയായിരുന്നു
