ബോളിവുഡ് താരം ടൈഗര്‍ ഷ്രോഫിനെതിരായ വധശ്രമക്കേസില്‍ പിടിയിലായ മൂന്ന് പ്രതികളെ മുംബൈ പൊലീസിന് കൈമാറും. രാജസ്ഥാനിലെ കോട്ടയില്‍ പുണെ-ജയ്പൂര്‍ എക്‌സ്പ്രസില്‍ യാത്ര ചെയ്യുന്നതിനിടെയാണ് പ്രതികളെ പിടികൂടിയത്. ലോറന്‍സ് ബിഷ്ണോയ് സംഘവുമായി പ്രതികള്‍ക്കുള്ള ബന്ധത്തെക്കുറിച്ചും ആക്രമണത്തിന്റെ ഗൂഢാലോചനയെക്കുറിച്ചും പൊലീസ് അന്വേഷണം തുടരുകയാണ്.
വാട്‌സ്ആപ്പ്, സിഗ്‌നല്‍ തുടങ്ങിയ ആപ്പുകള്‍ ഉപയോഗിച്ചാണ് ആക്രമണവുമായി ബന്ധപ്പെട്ട ആശയവിനിമയം നടത്തിയതെന്നാണ് പുറത്തുവരുന്ന വിവരം. ടൈഗര്‍ ഷ്രോഫിന്റെ വീടും ജിമ്മും നിരീക്ഷിച്ച ശേഷമാണ് ആക്രമണം ആസൂത്രണം ചെയ്തതെന്നാണ് പൊലീസിന്റെ സംശയം. പത്ത് ദിവസത്തോളം താരത്തെ പിന്തുടര്‍ന്നിരുന്നുവെന്നും റിപ്പോര്‍ട്ടുകളുണ്ട്. സംഭവത്തെക്കുറിച്ച് വിവരം ലഭിച്ചതിന് പിന്നാലെ രാജസ്ഥാന്‍ പൊലീസ് നടത്തിയ തിരച്ചിലിലാണ് പ്രതികളെ കണ്ടെത്തിയത്. ഇവരില്‍നിന്ന് ആയുധങ്ങളൊന്നും പിടിച്ചെടുത്തിട്ടില്ല.
22കാരനായ ഹൃത്വിക് കുമാര്‍, 18കാരനായ റെഹാന്‍, 17കാരനായ ഫൂല്‍ സിങ് എന്നിവരാണ് പിടിയിലായത്. ഇവരില്‍ രണ്ടുപേര്‍ ആക്രമണത്തിനായി നിയോഗിക്കപ്പെട്ടവരും മൂന്നാമന്‍ വെടിവെപ്പിന് ശേഷം രക്ഷപ്പെടാന്‍ സഹായിച്ചയാളുമാണെന്നാണ് അന്വേഷണസംഘത്തിന്റെ നിഗമനം. ബിഹാര്‍ സ്വദേശിയായ ഹൃത്വിക് മുംബൈയില്‍ താമസിച്ച് ജോലി ചെയ്തുവരികയായിരുന്നു. ഹരിയാന സ്വദേശികളാണ് മറ്റ് രണ്ടുപേര്‍. ആക്രമണത്തിന് ശേഷം ജയ്പൂര്‍ വഴി നേപ്പാളിലേക്ക് കടക്കാനായിരുന്നു പ്രതികളുടെ നീക്കമെന്നാണ് പൊലീസ് വ്യക്തമാക്കുന്നത്.
കഴിഞ്ഞ ഞായറാഴ്ച വൈകിട്ട് മുംബൈയിലെ ജുഹുവില്‍ ഫുട്‌ബോള്‍ കളി കഴിഞ്ഞ് ടൈഗര്‍ ഷ്രോഫ് കാറില്‍ മടങ്ങുന്നതിനിടെയാണ് വെടിവെപ്പുണ്ടായത്. താരത്തിന്റെ ബിഎംഡബ്ല്യു കാര്‍ പുറത്തേക്ക് വരുന്നതിനിടെ ബൈക്കിലെത്തിയ അക്രമികള്‍ വെടിയുതിര്‍ക്കുകയായിരുന്നു. ടൈഗര്‍ പരിക്കേല്‍ക്കാതെ രക്ഷപ്പെട്ടെങ്കിലും ഡ്രൈവര്‍ക്കും സമീപത്തുണ്ടായിരുന്ന ഒരാള്‍ക്കും വെടിയേറ്റു. സംഭവത്തില്‍ മുംബൈ പൊലീസ് അന്വേഷണം ഊര്‍ജിതമാക്കിയിരുന്നു.
ആക്രമണത്തിന്റെ ഉത്തരവാദിത്തം ലോറന്‍സ് ബിഷ്ണോയ് സംഘവുമായി ബന്ധമുള്ളവര്‍ ഏറ്റെടുത്തതായി സമൂഹമാധ്യമങ്ങളില്‍ സന്ദേശങ്ങള്‍ പ്രചരിച്ചിരുന്നു. സല്‍മാന്‍ ഖാനുമായുള്ള ടൈഗറിന്റെ അടുപ്പമാണ് ആക്രമണത്തിന് പിന്നിലെ കാരണമെന്ന റിപ്പോര്‍ട്ടുകളുമുണ്ട്. എന്നാല്‍ ആക്രമണത്തിന്റെ പിന്നിലെ ഗൂഢാലോചനയും ഓരോ പ്രതിയുടെയും പങ്കും സംബന്ധിച്ച് മുംബൈ പൊലീസ് വിശദമായ അന്വേഷണം നടത്തിവരികയാണ്.
