ഒരു കേസും കൂടി ഒത്തുതീര്പ്പാക്കിയാല് ജയിലില് കഴിയുന്ന പ്രമുഖ വ്യവസായി അറ്റ്ലസ് രാമചന്ദ്രന്റെ മോചനം ഉടനെന്ന് സൂചന. കേന്ദ്ര വിദേശകാര്യമന്ത്രി സുഷമാ സ്വരാജിന്റെ ഇടപെടലും മധ്യസ്ഥരുടെ നീക്കവുമാണ് അനുകൂലമായത്. 2015 ആഗസ്റ്റിലാണ് അറ്റ്ലസ് രാമചന്ദ്രന് ദുബൈയിലെ ജയിലിലായത്. 3.40 കോടി ദിര്ഹമിന്റെ രണ്ട് ചെക്കുകള് മടങ്ങിയ കേസില് മൂന്ന് വര്ഷത്തേക്കാണ് ദുബൈ കോടതി ശിക്ഷിച്ചത്. അറ്റ്ലസ് ജ്വല്ലറിയുടെ 50 ബ്രാഞ്ചുകളുടെ ഉടമയായിരുന്ന രാമചന്ദ്രന് 22 ബാങ്കുകളിലുമായി 500 ദശലക്ഷം ദിര്ഹത്തിന്റെ ബാധ്യതയാണ് ഉണ്ടായിരുന്നത്. ഇതിന്റെ തിരിച്ചടവ് മുടങ്ങിയതോടെ ബാങ്ക് ഓഫ് ബറോഡയടക്കം 23 ബാങ്കുകളാണ് അറ്റ്ലസ് രാമചന്ദ്രനെതിരേ കേസ് നല്കിയത്.
നല്കിയ വായ്പകള് മുടങ്ങിയതിന്റെ അടിസ്ഥാനത്തിലാണ് ബാങ്കുകള് കൂട്ടമായി കേസ് നല്കിയത്. ഇതിനെത്തുടര്ന്ന് 2015 ഓഗസ്റ്റ് മാസത്തില് അദ്ദേഹം ദുബായില് ജയിലിലായി. കൂടെ മകള് മഞ്ജുവും മരുമകന് അരുണിനും കോടതി ജയില് ശിക്ഷ വിധിച്ചു. മഞ്ജു കടുത്ത ജാമ്യവ്യവസ്ഥകളോടെ പുറത്തിറങ്ങിയെങ്കിലും അറ്റ്ലസ് രാമചന്ദ്രനും മരുമകന് അരുണും ഇപ്പോഴും ജയിലിലാണ്.
