ആദിക്ക് ശേഷം പ്രണവ് മോഹന്‍ലാല്‍ നായകനാകുന്ന ചിത്രം സംവിധാനം ചെയ്യുന്നത് അരുണ്‍ഗോപി. ടോമിച്ചന്‍ മുളകുപാടം നിര്‍മ്മിക്കുന്ന ഈ ചിത്രം രാമലീലയ്ക്ക് ശേഷം അരുണ്‍ ഗോപിയുടെ ആദ്യ ചിത്രമാണ്. പ്രണവിന്റെയും കരിയറിലെ രണ്ടാമത്തെ ചിത്രമാണിത്. അരുണ്‍ ഗോപി തന്റെ ഫെയ്‌സ്ബുക്ക് പേജിലൂടെയാണ് ഇക്കാര്യം പ്രഖ്യാപിച്ചത്. നേരത്തെ അന്‍വര്‍ റഷീദിന്റെ നിര്‍മ്മാണത്തില്‍ വൈശാഖ് സംവിധാനം ചെയ്യുന്ന ചിത്രത്തിലാണ് പ്രണവ് അഭിനയിക്കുന്നതെന്ന് വാര്‍ത്തയുണ്ടായിരുന്നു. എന്നാല്‍ ഈ ചിത്രത്തിന് ശേഷമാകും അത്.
പേരിടാത്ത ചിത്രത്തിന്റെ തിരക്കഥയും അരുണ്‍ ഗോപി തന്നെയാണ് നിര്‍വഹിക്കുന്നത്. നേരത്തെ സച്ചിയുടെ തിരക്കഥയിലാണ് അരുണ്‍ ഗോപി രാമലീല സംവിധാനം ചെയ്തത്.
മോഹന്‍ലാലിന്റെ എക്കാലത്തെയും വലിയ പണംവാരി പടമായ പുലിമുരുകന്‍ നിര്‍മ്മിച്ചതും ടോമിച്ചന്‍ മുളകുപാടമായിരുന്നു. അതിന് ശേഷം രാമലീലയും. ഇപ്പോള്‍ പ്രണവിന്റെ പുതിയ ചിത്രവും ഒരുക്കുന്നത് ടോമിച്ചന്‍ നിര്‍മ്മിക്കുന്നത്.
