മഹാരാഷ്ട്രയിലെ ബരാമതിയില് വിമാനം തകര്ന്നു വീണുണ്ടായ അപകടത്തില് മഹാരാഷ്ട്ര ഉപമുഖ്യമന്ത്രിയും എന്സിപി നേതാവുമായ അജിത് പവാര് അന്തരിച്ചു. 66 വയസായിരുന്നു. അജിത് പവാറിനൊപ്പം വിമാനത്തിലുണ്ടായിരുന്ന 5 പേര്ക്കും ജീവന് നഷ്ടപ്പെട്ടതായി വാര്ത്താ ഏജന്സിയായ പിടിഐ റിപ്പോര്ട്ട് ചെയ്യുന്നു. ഇന്ന് രാവിലെയാണ് മുംബൈയില് നിന്നും മഹാരാഷ്ട്രയിലെ ബരാമതിയിലേക്ക് പവാറും അനുയായികളും സ്വകാര്യവിമാനത്തില് യാത്ര ചെയ്തത്. അപകടത്തില് പെട്ടതോടെ വിമാനം പൂര്ണ്ണമായും കത്തിനശിച്ചു.
ലാന്റിംഗിന് തൊട്ടുമുമ്പായിരുന്നു വിമാനം അപകടത്തില് പെട്ടത്. രാവിലെ 8.45ഓടെയാണ് അപകടമുണ്ടായത്. താഴെ വീണ വിമാനം പൊട്ടിത്തെറിക്കുകയായിരുന്നുവെന്ന് ദൃക്സാക്ഷികള് പറയുന്നു. അജിത് പവാറിനൊപ്പം സുരക്ഷാ ഉദ്യോഗസ്ഥരും അനുയായികളും പൈലറ്റും മരിച്ചു. വിമാനം അപകടത്തില് പെട്ട ഉടന് തന്നെ രക്ഷാപ്രവര്ത്തനം നടത്തിയെങ്കിലും ആരുടേയും ജീവന് രക്ഷിക്കാനായില്ല. അതേസമയം, അപകടത്തിന്റെ പശ്ചാത്തലത്തില് വിമാനത്താവളത്തിന്റെ പ്രവര്ത്തനം നിര്ത്തിവെച്ചിരിക്കുകയാണ്.
6 സര്ക്കാരുകളില് ഉപമുഖ്യമന്ത്രിയായിരുന്നു അജിത് പവാര്. ഏറ്റവും കൂടുതല് കാലം ഉപമുഖ്യമന്ത്രിയായ നേതാവായിരുന്നു അജിത് പവാര്. ഒരു തെരഞ്ഞെടുപ്പില് പോലും തോല്ക്കാത്ത നേതാവായിരുന്ന പവാര് 8 തവണ നിയമസഭയിലേക്കും ഒരിക്കല് ലോക്സഭയിലേക്കും ജയിച്ചു കയറി. മഹാരാഷ്ട്രയില് അനിഷേധ്യനായിരുന്ന അജിത് പവാറിന്റെ അപ്രതീക്ഷിത വേര്പാടില് ഞെട്ടലിലാണ് നേതാക്കള്.
