ആഗോള അയ്യപ്പ സംഗമവുമായി ബന്ധപ്പെട്ട് കഴിഞ്ഞ ദിവസങ്ങളില് വന്ന വാര്ത്തകള് വേദനാജനകവും സത്യ വിരുദ്ധവുമാണെന്നും തികച്ചും അവാസ്തവമായ ചില പ്രചാരണങ്ങള് നടക്കുന്നുവെന്നും തിരുവിതാംകൂര് ദേവസ്വം ബോര്ഡ്
ദേവസ്വം ഓഡിറ്റ് റിപ്പോര്ട്ടിലോ, സ്പെഷ്യല് കമ്മീഷണര് കോടതിയില് സമര്പ്പിച്ച റിപ്പോര്ട്ടിലോ മുഖ്യമന്ത്രിക്ക് കട്ടില് വാങ്ങാന് തുക ചെലവഴിച്ചു എന്ന ഒരു പരാമര്ശവും ഇല്ല.
ആഗോള അയ്യപ്പ സംഗമത്തിന്റെ തുടക്കത്തില് ഒരു ഭജന് അവതരിപ്പിക്കണമെന്ന നിര്ദേശം ഉയര്ന്നിരുന്നു. നന്ദഗോവിന്ദം ഭജന്സ് സംഘത്തെ സമീപിച്ചെങ്കിലും, അന്നേ ദിവസം മറ്റ് പരിപാടികള് ഉണ്ടായതിനാല് പങ്കെടുക്കാന് കഴിയില്ലെന്ന് അവര് അറിയിച്ചു. തുടര്ന്ന് പ്രശസ്ത സംഗീതജ്ഞനായ ഇഷാന് ദേവ്നെ സമീപിച്ചു. ചുരുങ്ങിയ സമയത്തിനുള്ളില് 25-ലധികം കലാകാരന്മാരും 10-ലധികം ടെക്നീഷ്യന്മാരും ഉള്പ്പെടെ 35 പേര് പങ്കെടുത്ത മികച്ച സംഗീതാവിഷ്കാരമാണ് സംഘം അവതരിപ്പിച്ചത്. വിവിധ ട്രൂപ്പുകളെ ഏകോപിപ്പിച്ചാണ് പരിപാടി സംഘടിപ്പിച്ചത്. സംഘത്തിന്റെ അഞ്ച് ദിവസത്തെ താമസം, ഭക്ഷണം, റിഹേഴ്സല് തുടങ്ങി എല്ലാ ചെലവുകളും ഉള്പ്പെടുത്തി 8 ലക്ഷം രൂപയാണ് ചെലവായത്.
നന്ദഗോവിന്ദം ഭജന്സ് സംഘത്തിന് തുക നല്കിയതായി ബോര്ഡിന്റെ ഓഡിറ്റര് റിപ്പോര്ട്ടില് പറയുന്നത് പിശകാണ്. ഇവന്റ് മാനേജ്മെന്റ് ഏജന്സി ദേവസ്വം ബോര്ഡിന്റെ ചാര്ട്ടേഡ് അക്കൗണ്ടന്റിന് സമര്പ്പിച്ച സ്റ്റേറ്റ്മെന്റില് അശ്രദ്ധയായി ഉണ്ടായ പിശകാണ് നന്ദഗോവിന്ദം ഭജന്സ് പരിപാടി അവതരിപ്പിച്ചു എന്ന രീതിയിലുള്ള തെറ്റിദ്ധാരണയ്ക്ക് ഇടയാക്കിയത്.
സ്പോണ്സര്ഷിപ്പ് തുക ലഭിക്കുന്നതില് വൈകിവരുന്നത് പരിപാടിയുടെ നടത്തിപ്പിനെ ബാധിക്കാതിരിക്കാന്, 2025-2026 ബഡ്ജറ്റിലെ Expenditure Head 2G - Supplies & Contingencies എന്ന ശീര്ഷകത്തിലെ ഉപശീര്ഷകമായ 21 - Religious Convention & Discourse എന്ന തലക്കെട്ടില് വകയിരുത്തിയിരുന്ന 5 കോടി രൂപ ആഗോള അയ്യപ്പ സംഗമത്തിനായി ധനലക്ഷ്മി ബാങ്കില് ആരംഭിച്ച പ്രത്യേക സേവിംഗ്സ് അക്കൗണ്ടിലേക്ക് നിക്ഷേപിച്ചു. ആ അക്കൗണ്ടില് നിന്ന് 3 കോടി രൂപ IIIC-ക്ക് അഡ്വാന്സായി നല്കി. കൂടാതെ താമസസൗകര്യങ്ങള്ക്കായി വിവിധ ഹോട്ടലുകള്ക്ക് 12,76,440 രൂപയും, ജി.എസ്.ടി ഇനത്തില് 15,25,424 രൂപയും നല്കി.
വരവ്-ചെലവ് കണക്കുകള് അന്തിമമായിട്ടില്ല. എന്നാല് ഇതുവരെ ലഭിച്ച സ്പോണ്സര്ഷിപ്പ് തുക മൂന്ന് കോടിയാണ്:
1. ധനലക്ഷ്മി ബാങ്ക് - ജി.എസ്.ടി ഒഴികെ 2 കോടി രൂപ
2. കേരള ബാങ്ക് - ജി.എസ്.ടി ഉള്പ്പെടുത്തി 1 കോടി രൂപ
ഇതിന് പുറമെ, Adani Group ഒരു കോടി രൂപ നല്കുമെന്ന് വാഗ്ദാനം ചെയ്തിട്ടുണ്ട്.
ലഭിച്ച മൂന്ന് കോടി രൂപ 17-10-2025-ന് ദേവസ്വം ബോര്ഡ് ജനറല് ഫണ്ടില് നിക്ഷേപിച്ചു. അതിലൂടെ അഡ്വാന്സായി നല്കിയ കോര്പ്പസ് ഫണ്ട് തിരിച്ചെത്തിയിട്ടുണ്ട്. പ്രത്യേക അക്കൗണ്ടില് പലിശ ഉള്പ്പെടെ 1,74,40,912 രൂപ അവശേഷിക്കുന്നു.ദേവസ്വം ഫണ്ടില് നിന്ന് എടുത്ത തുക തിരികെ നിക്ഷേപിച്ചിട്ടില്ലെന്ന വാര്ത്ത വസ്തുതാവിരുദ്ധമാണെന്നും ദേവസ്വം ബോര്ഡ് അറിയിച്ചു
