വെയില്‍സ്: വെയില്‍സിലെ ബാരി മലയാളി വെല്‍ഫെയര്‍ അസോസിയേഷന്റെ ഓണാഘോഷം ബാരിയിലെ സെന്റ് റിച്ചാര്‍ഡ് ഗ്വിന്‍ ഹൈ സ്‌കൂളില്‍ വച്ച് സെപ്റ്റംബര്‍ 13ന് അതിഗംഭീരമായി ആഘോഷിച്ചു. ആഘോഷത്തില്‍ അധ്യക്ഷനായി അസോസിയേഷന്‍ പ്രസിഡന്റ് ശ്രി ടോംബിള്‍ കണ്ണത്, മുഖ്യ അതിഥിയായി വെയില്‍ ഓഫ് ഗ്ളാമോര്‍ഗനിലെ എം പിയും യുകെ ഗവണ്മെന്റിന്റെ പുതിയ സയന്‍സ് ആന്‍ഡ് ടെക്‌നോളജി വകുപ്പിന്റെ മന്ത്രിയുമായ ശ്രീ കനിഷ്‌ക നാരായണ്‍, മറ്റ് വിശിഷ്ട അതിഥികളായി ഇന്ത്യന്‍ ഹൈ കമ്മീഷന്റെ വെയില്‍സിലെ കോണ്‍സുലര്‍ ആയ ക്യാപ്റ്റന്‍ രാജ് അഗര്‍വാള്‍, വെയില്‍ ഓഫ് ഗ്ളാമോര്‍ഗന്‍ ബോറോ കൗന്റിയുടെ ഡെപ്യൂട്ടി മേയര്‍ കൗണ്‍സിലര്‍ കാരിസ് സ്റ്റെല്ലാര്‍ഡ് , യുക്മ ദേശീയ കമ്മറ്റി അംഗവും ലാന്‍ഡോക് കമ്മ്യൂണിറ്റി കൗണ്‍സിലറും ആയ ശ്രി ബെന്നി അഗസ്റ്റിന്‍, വെയില്‍സിലെ തമിള്‍ സംഗം പ്രസിഡന്റ് ശ്രിമതി കല്പന നടരാജന്‍ എന്നിവര്‍ സന്നിഹിതരായിരുന്നു. അസോസിയേഷന്‍ സെക്രട്ടറി ശ്രി പ്രവീണ്‍ കുമാര്‍ സ്വാഗതം അര്‍പ്പിച്ചു. അതിഥികളായി വന്ന എല്ലാവരെയും പ്രസിഡന്റ് ടോംബിള്‍ കണ്ണത് പൊന്നാടയണിയിച്ചുകൊണ്ട് സ്വീകരിച്ചു.
ബാരി മലയാളി വെല്‍ഫെയര്‍ അസോസിയേഷന്റെ ഓണാഘോഷം രാവിലെ പതിനൊന്നു മണിയോടെ കുട്ടികള്‍ക്കായുള്ള 'കുഞ്ഞോണം' എന്ന പാരിപാടിയോടെ ആരംഭിച്ചു. പന്ത്രണ്ട് മണിക്ക് ഓണസദ്യ ആരംഭിച്ചു. ബാരിയിലെ സജിന്റെ ( കേരള ഫുഡ് ബീറ്റ്സ് ) വളരെ രുചികരമായ ഓണസദ്യ എല്ലാവരും ആസ്വദിച്ചു. രണ്ടുമണിക്ക് പുതിയ യുകെ മന്ത്രിയായ ശ്രി. കനിഷ്‌ക നാരായണന് പ്രത്യേക സ്വീകരണം നല്‍കി. മുഖ്യ അതിഥിയായ മന്ത്രി ശ്രി കനിഷ്‌ക നാരായണ്‍ ബാരി മലയാളി അസ്സോസിയേഷന്റ ഈ വര്‍ഷത്തെ ഓണാഘോഷം നിലവിളക്കിനു തിരി കൊളുത്തികൊണ്ട് ഉത്ഘാടനം ചെയ്തു. തനിക്കു പുതിയതായി തന്നിരിക്കുന്ന സയന്‍സ് ആന്‍ഡ് ടെക്‌നോളജി മന്ത്രി എന്ന സ്ഥാനം ഏറ്റവും നല്ല രീതിയില്‍ ചെയ്യുമെന്ന് അദ്ദേഹം ഊന്നിപ്പറഞ്ഞു. അതുപോലെതന്നെ മലയാളി വെല്‍ഫെയര്‍ അസോസിയേഷന്‍ തനിക്ക് തന്ന സ്വീകരണത്തിന് എല്ലാവരോടും നന്ദി അര്‍പ്പിച്ചു.
ഇന്ത്യന്‍ ഹൈ കമ്മീഷന്റെ വെയില്‍സിലെ കോണ്‍സുലാര്‍ ആയ ക്യാപ്റ്റന്‍ രാജ് അഗര്‍വാള്‍ എല്ലാവര്‍ക്കും ഓണം ആശംസിക്കുകയും ഇങ്ങനെയുള്ള ആഘോഷങ്ങളിലൂടെ നമ്മുടെ തനതായ സംസ്‌കാരവും, കലയും ഡാന്‍സും ഒക്കെ പ്രദര്‍ശിപ്പിക്കുവാനുള്ള ഒരവസരമാണ് എന്നും അദ്ദേഹം കൂട്ടിച്ചേര്‍ത്തു. യുക്മയുടെ ദേശീയ കമ്മറ്റി അംഗവും ലാന്‍ഡോക്കിലെ കമ്മ്യൂണിറ്റി കൗണ്‍സിലര്‍ കൂടിയായ കൗണ്‍സിലര്‍ ബെന്നി അഗസ്റ്റിന്‍ എല്ലാ വിശിഷ്ടാതിഥികളെ സദസിന് പരിചയപ്പെടുത്തുകയും, യുക്മ എന്തിന് വേണ്ടി നിലകൊള്ളുന്നുവെന്നും യുക്മയുടെ ഓരോ പ്രവര്‍ത്തനങ്ങളിലും യുക്മയുമായി സഹകരിച്ചു പങ്കെടുക്കുവാനും അഭ്യര്‍ത്ഥിച്ചു. യുക്മ എന്ന പ്രസ്ഥാനത്തിലൂടെ വരും തലമുറയ്ക്ക് നമ്മുടെ കേരളീയ സംസ്‌കാരവും പാരമ്പര്യവും മനസിലാക്കുവാനും, കലയോടും സാഹിത്യത്തോടും അവര്‍ക്കൊരു അഭിരുചി ജനിപ്പിക്കുവാനും സഹായിക്കട്ടെ എന്നുകൂടി അദ്ദേഹം സൂചിപ്പിച്ചു.
ഉല്‍ഘാടന സമ്മേളനത്തിന് ശേഷം മലയാളി വെല്‍ഫെയര്‍ അസോസിയേഷന്‍ അംഗങ്ങളുടെ വിവിധ കലാപരിപാടികള്‍ നടന്നു. തിരുവാതിര, സിനിമാറ്റിക് ഡാന്‍സസ്, കൈകൊട്ടിക്കളി, പാട്ടുകള്‍, മിട്ടായി പറക്കല്‍, കസേരകളി, തുടങ്ങിയ അനവധി പരിപാടികള്‍ സ്റ്റേജില്‍ അവതരിപ്പിച്ചു. ഈ വര്‍ഷത്തെ ഓണാഘോഷപരിപാടികള്‍ സ്‌പോണ്‍സര്‍ ചെയ്തിരുന്നത് ഇന്‍ഫിനിറ്റി മോര്‍ട്ടഗേജും, കാര്‍ഡിഫ് മല്ലു ഷോപ്പും ആണ്. ഇന്നേ ദിവസത്തെ എല്ലാ ഫോട്ടോകളും എടുത്തിരിക്കുന്നത് അശ്വിന്‍ തെങ്ങുംപള്ളിയില്‍ ആണ്. മലയാളി വെല്‍ഫെയര്‍ അസോസിയേഷന്റെ ഈ വര്‍ഷത്തെ ഓണാഘോഷം വിജയപ്രദമാക്കുന്നതിനു വേണ്ടി കമ്മറ്റി അംഗങ്ങളായ ബെര്‍ലി, ഷാജി തോമസ്, പ്രവീണ്‍ കുമാര്‍, ഡിറോണ്‍, വിഷ്ണു പ്രസാദ്, അനന്തന്‍, റ്റിബിന്‍, ജിബിന്‍, ഗീവര്‍ഗീസ് മാത്യു അരവിന്ദ് എന്നിവരും പുതിയതായി കമ്മറ്റിയില്‍ വന്ന നിതിന്‍, മുകുള്‍, ശ്രീജിത്ത്, ഹരിത തുടങ്ങിയവരും നേതൃത്വം നല്‍കിയപ്പോള്‍ പരിപാടിയില്‍ പങ്കെടുത്തവര്‍ എല്ലാവരും കാഴ്ചക്കാര്‍ ആയി നില്കാതെ ഒത്തൊരുമിച്ചു പ്രവര്‍ത്തിചത് പരിപാടിയുടെ മാറ്റ് കൂട്ടി.
എല്ലാവര്‍ക്കും ഒരു നല്ല സമൃദ്ധിയുടെയും സമാധാനത്തിന്റെയും നാളുകള്‍ നേര്‍ന്നു കൊണ്ടും പുതു പരിപാടികള്‍ പ്രഖ്യാപിച്ചുകൊണ്ടും ഈ വര്‍ഷത്തെ ഓണാഘോഷം പര്യവസാനിച്ചു.
(മുകുള്‍ ജയശ്രീ കിഷോര്‍, കാര്‍ഡിഫ് )
