ജനുവരി 26 ന് നടത്തുമെന്ന് കര്ഷകര് പ്രഖ്യാപിച്ചിട്ടുള്ള ട്രാക്ടര് റാലി നിരോധിക്കണമെന്ന് ആവശ്യപ്പെട്ട് ദില്ലി പൊലീസ് ജോയിന്റ് കമ്മീഷണര് നല്കിയ ഹര്ജി സുപ്രീംകോടതി ഇന്ന് വീണ്ടും പരിഗണിക്കും. കൃഷി നിയമങ്ങളുമായി ബന്ധപ്പെട്ട ഹര്ജികളില് ഇടക്കാല ഉത്തരവിറക്കിയ ചീഫ് ജസ്റ്റിസ് എസ് എ ബോബഡെ അധ്യക്ഷനായ ബഞ്ചാണ് ഹര്ജി പരിഗണിക്കുന്നത്. സൈനികര്ക്കൊപ്പം കര്ഷകരും റിപ്പബ്ലിക് ദിനം ആഘോഷിക്കുമെന്നാണ് നേതാക്കള് വ്യക്തമാക്കിയിട്ടുള്ളത്. ദില്ലി അതിര്ത്തികളില് സമാധാനപരമായി റാലി നടത്തും. റിപ്പബ്ലിക്ക് ദിന പരേഡ് തടസ്സപ്പെടുത്തില്ലെന്നും കര്ഷക നേതാക്കള് വ്യക്തമാക്കിയിട്ടുണ്ട്. അതേസമയം, കര്ഷക സമരം ഇന്ന് 55ാം ദിവസത്തിലേക്ക് കടന്നു.
വനിതകളെ അണിനിരത്തിയുള്ള രാജ്യ വ്യാപക പ്രതിഷേധവും റിപ്പബ്ലിക് ദിനത്തില് ട്രാക്ടര് പരേഡും നടത്തുവാനാണ് കര്ഷകരുടെ തീരുമാനം. ട്രാക്റ്റര് പരേഡ് നടത്താന് അനുവദിക്കരുതെന്ന് ആവശ്യപ്പെട്ട് ദില്ലി പൊലീസ് നല്കിയ ഹര്ജിയില് സുപ്രീംകോടതി കര്ഷക സംഘടനകള്ക്ക്
നേരത്തെ നോട്ടീസ് നല്കിയിരുന്നു. താല്കാലികമായ നീക്കങ്ങള് കൊണ്ട് സമരം തീരില്ലെന്നും വേണ്ടത് ശാശ്വത പരിഹാരമാണെന്നും നിയമങ്ങള് പിന്വലിക്കണമെന്നും സംഘടനാ നേതാക്കള് പറയുന്നു. നിയമങ്ങള് നടപ്പാക്കുന്നത് സ്റ്റേ ചെയ്ത സുപ്രീം കോടതി നടപടി സ്വാഗതം ചെയ്യുമ്പോഴും സുപ്രീംകോടതി നിയോഗിച്ച സമിതിയില് സ്വതന്ത്ര നിലപാടുള്ള ആരും ഇല്ലെന്നതാണ് പ്രധാന വിമര്ശനമായി ഉയരുന്നത്.