നാഗര്കോവില് രാജക്കമംഗലത്ത് യൂട്യൂബറുടെ വീട് കുത്തിത്തുറന്ന് പണവും സ്വര്ണവും കൊള്ളയടിച്ച സംഭവത്തില് നാല് പേര് അറസ്റ്റില്. പ്രതികളില് നിന്ന് 98 പവന് സ്വര്ണ്ണാഭരണങ്ങളും പണവും പിടിച്ചെടുത്തു. കഴിഞ്ഞ 24നായിരുന്നു കേസിനാസ്പദമായ സംഭവം. തെക്കേ മൂലയില് വിജിപി ഗാര്ഡനില് താമസിക്കുന്ന യൂട്യൂബര് കൂടിയായ വിനോദ് കുമാറും ഭാര്യയും താമസിക്കുന്ന വീട്ടിലായിരുന്നു കവര്ച്ച.
24ന് വൈകുന്നേരം 6 മണിയോടെ കുടുംബം തിരുനെല്വേലിയിലേക്ക് പോയിരുന്നു. അര്ദ്ധരാത്രി 12 മണിയോടെ അവര് വീട്ടിലേക്ക് മടങ്ങിയപ്പോള് വീടിന്റെ പിന്വാതില് തകര്ത്തതായി കണ്ടെത്തി. തുടര്ന്ന്, വീടിന്റെ മുകളിലത്തെ നിലയിലെ മുറിയില് സൂക്ഷിച്ചിരുന്ന ആഭരണങ്ങള് ഉള്പ്പെടെ കൊള്ളയടിക്കപ്പെട്ടു.
തുടര്ന്ന് രാജക്കമംഗലം പോലീസ് സ്റ്റേഷനില് നല്കിയ പരാതിയുടെ അടിസ്ഥാനത്തില് ജില്ലാ പോലീസ് സൂപ്രണ്ട് അരുള് നഗര് ഐപിഎസിന്റെ നിര്ദ്ദേശപ്രകാരം നടത്തിയ അന്വേഷണത്തിലാണ് പ്രതികള് പിടിയിലായത്.
സംഭവസ്ഥലത്തും പരിസര പ്രദേശങ്ങളിലുമുള്ള 160 സിസിടിവി ക്യാമറകളും 35 സിഡിആര് റെക്കോര്ഡിംഗുകളും പ്രത്യേക സംഘം പോലീസ് പരിശോധിച്ചു. സാങ്കേതിക തെളിവുകളുടെ അടിസ്ഥാനത്തില്, പ്രതികളിലേക്ക് എത്തുകയായിരുന്നു.
ആലംകുളം സ്വദേശി മുരുകേശന് (30), തിമ്മരാജപുരം സ്വദേശി തങ്കപാണ്ടി (39) എന്നിവരെ സംഭവവുമായി ആദ്യം അറസ്റ്റ് ചെയ്തു. തുടര്ന്ന് നടത്തിയ അന്വേഷണത്തിന്റെ അടിസ്ഥാനത്തില് രണ്ട് പേരെ കൂടി അറസ്റ്റ് ചെയ്യുകയും ഇവരില് നിന്ന് ആകെ 98 പവന് സ്വര്ണ്ണാഭരണങ്ങള് പിടിച്ചെടുക്കുകയും ചെയ്തു.
അറസ്റ്റിലായവരെക്കുറിച്ചുള്ള അന്വേഷണം തുടരുകയാണ്. ഈ കുറ്റകൃത്യത്തില് മറ്റാരെങ്കിലും ഉള്പ്പെട്ടിട്ടുണ്ടോയെന്നും പോലീസ് അന്വേഷിക്കുന്നുണ്ട്.
