ബെംഗളൂരുവില്‍ കോളേജ് വിദ്യാര്‍ത്ഥിനിയെ വാടക മുറിയില്‍ മരിച്ച നിലയില്‍ കണ്ടെത്തി. ബെംഗളൂരു ആചാര്യ കോളജിലെ അവസാന വര്‍ഷ ബിബിഎം വിദ്യാര്‍ഥിനിയായ ദേവിശ്രീ(21)യെ ആണ് മരിച്ച നിലയില്‍ കണ്ടെത്തിയത്. വാടകയ്ക്കെടുത്ത മുറിയിലാണ് വിദ്യാര്‍ഥിനിയെ മരിച്ച നിലയില്‍ കണ്ടെത്തിയത്.
ദേവിശ്രീയുടെ ഒപ്പം താമസിച്ചിരുന്ന പ്രേം വര്‍ധന്‍ എന്നയാള്‍ ശ്വാസം മുട്ടിച്ച് കൊലപ്പെടുത്തിയതാണെന്നാണ് പ്രാഥമിക നിഗമനം.പ്രേമും ദേവിശ്രീയും രാവിലെ 9:30 ഓടെ വാടക മുറിയിലെത്തി രാത്രി 8:30 വരെ ഇരുവരും ഒപ്പം താമസിച്ചിരുന്നതായും പിന്നീട് മുറി പുറത്തുനിന്ന് പൂട്ടി പ്രേംവര്‍ധന്‍ ഓടി രക്ഷപ്പെടുകയായിരുന്നുവെന്ന് പൊലീസ് അറിയിച്ചു.
ഇയാള്‍ക്കായി അന്വേഷണം ആരംഭിച്ചതായും പൊലീസ് പറഞ്ഞു. കൊലപാതകത്തിനു പിന്നിലെ കാരണം വ്യക്തമല്ല. ഒളിവില്‍ കഴിയുന്ന പ്രേമിനെ കുറിച്ച് നിര്‍ണായക സൂചനകള്‍ ലഭിച്ചിട്ടുണ്ടെന്നും എത്രയും വേഗം അയാളെ അറസ്റ്റ് ചെയ്യുമെന്നും പൊലീസ് അറിയിച്ചു.
